Saan a nababbaba ngem 12 ti natay ken siam ti naireport a mapukpukaw bayat ti panangbegbeg ti napigsa a tudo a nangpataud iti nasaknap a panaglayus iti amin a paset ti pagilian idi napan a lawas, segun iti waragawag ti Philippine National Police (PNP) ita nga aldaw, Hulio 23.
Nairaman iti datos ti PNP dagiti pasamak gapu ken ni Bagyo Crising a nangbegbeg iti pagilian iti bayakabak a nanglayus iti Metro Manila ken dadduma a paset ti pagilian.
Segun ken ni Brig. Gen. Randulf Tuaño, chief information officer ti PNP, kaaduan a bilang ti naapektaran gapu iti pannakalmes--lima ti natay iti Calabarzon (Cavite, Laguna, Batangas, Rizal, Quezon) idinto a tallo iti Negros Island Region.
Dua ti natay gapu iti pannakalmes iti Mimaropa (Mindoro Oriental and Occidental, Marinduque, Romblon and Palawan) ken Metro Manila.
Pannakaimbestigar ti mining permit iti Dupax del Norte, kiniddaw ni Sen. Pangilinan
Kinuna ni Tuaño nga adda dua a natay, a natupakan ti natuang a kayo, iti Northern Mindanao ken Bangsamoro Autonomous Region in Muslim Mindanao (BARMM).
Naireport pay iti PNP nga adda lima a mapukpukaw gapu iti panaglayus iti Metro Manila, tallo iti Western Visayas, ken maysa iti Calabarzon.
Agingga idi rabii ti Martes (Hulio 22), kinuna ti PNP a nasuroken a 144,000 a tattao manipud iti 39,426 a pamilia ti adda kadagiti nadumaduma nga evacuation center ti pagilian.
Iti sabali a bangir, 300 nga empleado ti PNP ti inapektaran met ti nadawel a panawen. (Aaron Recuenco/Manila Bulletin//Lito Hilidon/Bannawag)
