Saanen a yapelar ti Department of Justice (DOJ) ti pannakaabsuelto ni Mamamayang Liberal (ML) Party-List Rep. Leila de Lima iti kasona a minaig iti illegal a droga ken ibabawida ti motion for reconsideration nga indatag dagiti prosekutor.
Daytoy ti kinuna ni Prosecutor General Richard Anthony D. Fadullon ita nga aldaw, Hulio 23, kalpasan ti panagsaritada ken ni Sekretario ti DOJ Jesus Crispin C. Remulla.
Segun ken ni Fadullon, di rumbeng a nangidatag ti prosecution team iti motion for reconsideration iti Muntinlupa City Regional Trial Court (RTC) idi Hulio 14 ta labsingen daytoy ti pannakaiparit ti double jeopardy, wenno mamindua a pannakausig iti maysa ken isu met laeng a basol.
Ngem inlawlawag ni Fadullon a ti pangngedengda a mangibabawi iti motion for reconsideration ket saan a gapu iti kiddaw ni De Lima a saanda koman a yapelar ti pannakaabsueltona, no di ket bukbukod a desision ti DOJ.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Inyapelar dagiti prosekutor ti pangngeddeng nga impaulog ti Muntinlupa City RTC Branch 204 idi Hunio 27 a nangabsuelto kada De Lima ken Ronnie Dayan iti kasoda nga illegal drugs trading iti sidong ti Republic Act (RA) 9165, wenno ti Comprehensive Dangerous Drugs Act of 2002.
Impaulog ti Muntinlupa RTC ti desisionna kas panangtungpal iti pangngeddeng ti Court of Appeals (CA) a nangwaswas iti desisionda idi Abril 30.
Insubli ti CA ti kaso iti Muntinlupa RTC ket inlawlawagda nga awan ti mabukel a pangngeddeng ti korte no awan ti nalawag a pannakaiparangarang dagiti kinapudno ken ti linteg a nagbatayan ti desisionda. (Jeffrey Damicog/Manila Bulletin//Lito Hilidon/Bannawag)
