Inggunamgunam ni Presidente Ferdinand Marcos Jr. ti kinapateg ti pagaramidan ti bala a panggepda nga ipatakder iti Subic ta paset daytoy ti programa ti panagdepensa ti Filipinas.
Iti joint press conference-da ken ni US President Donald Trump a naangay iti White House idi Hulio 22, kinuna ni Marcos a dagiti tarigagay a pannakamoderno ti armada ti Filipinas, agraman ti pagaramidan ti bala, ti direkta a sungbat iti agdama a kasasaad iti South China Sea ken iti Indo-Pacific region.
Inlawlawag ni Marcos a ti panangtulong ti US iti panangpartuat iti bala ket panangtulong iti panagbalin ti Filipinas nga agpannuray iti bagbagina iti panangdepensa ken tumakder a bukbukodna.
Kinuna ni Filipino Ambassador to the United States Jose Manuel Romualdez itay kallabes a nagsasaritan dagiti opisial ti Filipinas maipapan iti gandat ti US a mangbangon iti ammunitions hub iti Subic, a paset ti Luzon Economic Corridor a supsuportaran ti Washington.
Retirado a heneral, nakemmeg gapu iti panangsugsog a mangtippuog iti gobierno
Innayonna a silulukat ti Filipinas iti daytoy a proyekto ta nasayaat no agtinnulong ti US ken Filipinas iti depensa ken ekonomia, ta makatulong met ti nasao a proyekto iti ekonomia ti pagilian agsipud ta mangparnuay daytoy iti panggedan.
Iti biang ni President Trump, inlawlawagna a kasapulan ti US ti mangipatakder iti pagaramidan iti bala iti Subic, ta tarigagayanda a paaduen ti suplayda a bala ken missile kadagiti masungad a bulan ta kayatna a ti US ti kaaduan ti bala ken missile ngem iti ania man a pagilian. (Argyll Cyrus Geducos/Manila Bulletin//Lito Hilidon/Bannawag)
