Nagbalinen a severe tropical storm ni Bagyo Emong ket addaan pigsa a 110 a kilometro tunggal oras ken pugso nga agingga iti 135 a kilometro tunggal oras, segun iti waragawag ti Philippine Atmospheric, Geophysical and Astronomical Services Administration (PAGASA) itay 5:00 itay agsapa ti Hulio 24.

Itay 4:00 iti parbangon, nasaripatpatanda ni Emong iti 245 a kilometro iti laud ti Bacnotan, La Union.

Marikna ti puersa ti bagyo kadagiti lugar nga adda iti Signal No. 3 kas iti amianan a paset ti Pangasinan (Anda, Bolinao, ken Bani) ken ti laud a paset ti La Union (Luna, Balaoan, Bacnotan, San Juan, Siudad ti San Fernando, Bauang, ken Caba).

Napigsa nga angin ti marikna dagiti lugar a naipan iti Signal No. 2: Ilocos Norte, Ilocos Sur, ti dadduma a paset ti La Union, ti laud a paset ti Apayao (Conner, Kabugao, ken Calanasan), Abra, Kalinga, Mountain Province, Ifugao, Benguet, ti tengnga a paset ti Pangasinan (Agno, Burgos, Mabini, Siudad ti Alaminos, Sual, Labrador, Bugallon, Infanta, Dasol, Lingayen, Binmaley, Dagupan City, Calasiao, Santa Barbara, Mangaldan, Mapandan, Manaoag, Laoac, Binalonan, San Manuel, San Nicolas, Pozorrubio, Sison, San Fabian, ken San Jacinto), ken ti laud a paset ti Nueva Vizcaya (Kayapa ken Santa Fe).

Nasional

Retirado a heneral, nakemmeg gapu iti panangsugsog a mangtippuog iti gobierno

Naipan iti Signal No. 1 ti Batanes, Cagayan agraman Babuyan Islands, ti laud ken tengnga a paset ti Isabela (Santo Tomas, Delfin Albano, Quezon, Mallig, Quirino, Roxas, San Manuel, Aurora, San Mateo, Ramon, Cordon, Burgos, Cabatuan, Cabagan, San Pablo, Santa Maria, Tumauini, Gamu, Luna, Maconacon, Alicia, San Mariano, Naguilian, San Guillermo, Siudad ti Cauayan, Echague, Ilagan City, Angadanan, Benito Soliven, Siudad ti Santiago, Reina Mercedes, San Agustin, Divilacan, San Isidro, ken Jones), ti dadduma a paset ti Nueva Vizcaya, Quirino, ti dadduma a paset ti Apayao, ti dadduma a paset ti Pangasinan, ti amianan ken tengnga a paset ti Zambales (Santa Cruz, Candelaria, Masinloc, Palauig, Iba, Botolan, ken Cabangan), Tarlac, ken ti laud ken tengnga a paset ti Nueva Ecija (Carranglan, Lupao, Talugtug, Cuyapo, Nampicuan, Guimba, Science City of Muñoz, San Jose City, Pantabangan, Rizal, Llanera, Talavera, Santo Domingo, Quezon, Licab, Aliaga, Zaragoza, San Antonio, Jaen, Cabanatuan City, Santa Rosa, General Mamerto Natividad, Palayan City, Bongabon, ken Laur).

Mangyeg iti napigsa a bayakabak ni Emong iti Ilocos Norte, Tarlac, Abra, Mountain Province, Ifugao, Ilocos Sur, La Union, Pangasinan, Zambales, Benguet, Cagayan, Kalinga, Apayao, Isabela, Nueva Vizcaya, ken Nueva Ecija.

Mangyeg met iti napigsa a tudo ti abagat (southwest monsoon) iti Bataan, Occidental Mindoro, Metro Manila, Pampanga, Bulacan, Cavite, Batangas, Laguna, Rizal, Quezon, Oriental Mindoro, Palawan, Marinduque, Romblon, Antique, Camarines Sur, Albay, ken Sorsogon.

Posible a lumabas ni Emong iti asideg ti Pangasinan ita a malem, wenno agdisso iti Ilocos Region ita a rabii wenno agsapa iti Biernes (Hulio 25). (Ma. Cristina Araya/PNA//Lito Hilidon/Bannawag)