Agdagup iti 25 a tao ti natay gapu iti nagtitipon nga epekto dagiti bagyo a “Crising," “Dante,” “Emong," ken ti abagat (southwest monsoon) a napasaran idi pay laeng napan a lawas, bayat ti isasangpet iti pagilian ti eroplano manipud iti Estados Unidos tapno tumulong iti maiwayat a humanitarian assistance and disaster response (HADR), kuna dagiti autoridad ita nga aldaw, Hulio 25.
Segun iti National Disaster Risk Reduction and Management Council (NDRRMC), siam kadagiti natay ket adda iti National Capital Region (NCR) a naapektaran ti nasaknap a panaglayus.
Tallo ti natay a nailanad iti tunggal rehion kas iti Calabarzon (Region 4A), Western Visayas (Region 6), Negros Island Region (NIR), ken Northern Mindanao (Region 10).
Saggaysa ti natay iti Central Luzon (Region 3), Mimaropa (Region 4B), Davao (Region 11), ken Caraga (Region 13).
Senado, pinasingkedanna ti ₱6.793-trilion a nailian a badiet para 2026
Agdagup iti 3.8 a milion a tattao wenno maysa a milion a pamilia ti naapektaran kadagiti 17 a rehion, agraman ti 278,000 a tattao ti naawanan ti balay.
Agtultuloy ti Office of Civil Defense (OCD) ken ti Armed Forces of the Philippines (AFP) ti insayangkatda a joint disaster response operations.
Kinuna ni Maj. Joseph Richard Calma, deputy spokesperson ti Philippine Air Force (PAF), a mapanen iti Clark Air Base iti Pampanga ti KC-135 nga eroplano manipud iti Estados Unidos, a mangyeg iti alikamen para iti HADR.
Kinuna ni Calma a nakasagana ti nasurok a 40 nga alikamen ti PAF, agraman dagiti Sokol helicopter a nakapuesto iti Clark ken dagiti Black Hawk helicopter a nakasagana iti Basa Air Base.
Iti sabali a bangir, mapanen a 10,292 a tattao ti inarayat ti Philippine Coast Guard (PCG) a nalakon iti NCR, Central Luzon, Southern Tagalog, ken Amianan a laud ti Luzon sipud idi Hulio 21.
Mapan a 84 a siudad ken ili ti nangideklarar iti state of calamity, ket 42 kadagitoy ti adda iti Central Luzon, 27 iti Calabarzon, innem iti Ilocos Region, lima iti NCR, tallo iti Western Visayas, ken maysa iti Mimaropa. (Martin Sadongdong/Manila Bulletin//Lito Hilidon/Bannawag)
