MERCY RAMOS GAÑO

KEN ni Manong Renal (Reynaldo Fagaragan Antalan), 58,  ti Brgy. Aglipay, Pinili, Ilocos Norte, dakkel ti akem ti kawayan iti panangisakadna iti pamiliana.

Sangapulo ket tallo a tawen a nag-security guard ni Manong Renal iti Kamanilaan a nagkitaanda ken baketna. Tawen 1998 idi pinilida ti nagawid iti ilida a Pinili tapno isun ti pagnaedanda.

Idi addadan iti ilida, nagpampanunot no ania ti mabalin a pamastrekanna malaksid iti panagtalon. Gapu ta adu ti kawayan ti pamiliada, pinadasna ti nagaramid iti katre a kawayan. Iti pananglagipna, immuna a nasursurona ti bamboo craft idi adda iti high school gapu iti subject a Practical Arts. Adda nakakita iti inaramidna ket nagustuan daytoy. Nagpaaramid met. Manipud idi, pagdidinnamagandan dagiti aramidna. Ta dagiti nakapadasen, kunada a napintas ti kalidad dagiti aramidna. Nabaneg ken nalagda. Napaut nga usaren. 

Kolum

DAGITI VLOGGER ITI AMIANAN 15: Intayon Makiwatwat Idiay Bagulin!

Ni Reynaldo F. Antalan (nakakallugong) iti kinawayananna iti maysa nga aldaw a panagbisita dagiti taga-MMSU, ILAARRDEC, ken ti LGU-Pinili. Kaduana da (agpakawanan) Rolando Rabanal, MMSU; Michelle Adzuara, LGU-MAO Pinili; Sherlyn Nicolas, MMSU; Mary Ann Rarogal, ken Guiller Lopez, ILAARRDEC.

Isu nga aginggga ita, adu latta dagiti agor-order kenkuana.  Agduduma dagiti ar-aramidenna. Adda tugaw, katre, sala set, dining set, divan, cabinet, Cleopatra, ken dadduma pay. No dadduma, dagiti agpaaramid ti mangted Iti design a surotenna.  No adda kaaddaan dagiti paorderna, mangayab Iti maysa wenno dua a kaduana. 

Tapno mataginayon ti kinawayananda a pagalaanna kadagiti aramidenna a muebles, binulan nga agdalus  tapno napimpintas ken nawalwalat a dumakkel dagiti kawayan. 

Iti agdama, adda 16 a rimmuong ti kawayan (bamboo clumps) a tagtagibenen ni Manong Renal ken ti pamiliada. Mangnamnama ketdi a manayonan pay dagiti barayti dagiti aywanda a kawayan.

Reynaldo F. Antalan, Magsasaka Siyentista.

Kinaagpaysona, adda dagiti agpapaaramid iti tugaw wenno katre a Buddha bamboo ti kayatda a maaramat a palidpid, di kad’ gumatgatang daytoy kadagiti adda mulana a Buddha bamboo.

Nabiit pay a naaprobaran ti kiddaw ni Manong Renal a pannakaisayangkat ti maysa a training iti bamboo production and rejuvenation agraman ti pannakaipasdek ti Bambusetum iti lugarda babaen ti tulong ti Local Government Unit (LGU) ti Pinili, Ilocos Norte ken ti Mariano Marcos State University (MMSU). Kaduananto a masanay dagiti kabarangayanna a miembro ti Bamboo Association.

Wen, saan a gagangay a mannalon ni Manong Renal. Nadutokan a Magsasaka Siyentista (MS) babaen ti Agricultural Training Institute (ATI) ti Region 1 babaen ti pannakibinnulig ti ILAARRDEC, MMSU, ken ti LGU Pinili babaen ti Municipal Agriculture Office (MAO).  Agserserbi pay a Local Farmer Technician (LFT) iti Provincial Government of Ilocos Norte (PGIN) iti babaen ti Office of the Provincial Agriculturist.–O

Maysa kadagiti katre a kawayan nga aramid ni Manong Renal.