Nasurok a ₱163.6 a milion ti inisial a karkulo iti nadadael gapu iti bagyo Emong iti La Union, segun iti report ti Rapid Damage Assessment and Needs Analysis (RDANA) idi Domingo, Hulio 27.
Iti 2PM a report ti RDANA, ₱60.7 a milion ti nadadael iti agrikultura, ₱P86,900 ti napukaw a dingo, ken ₱102.8 a milion iti impraestruktura.
Agdagup met iti 14,131 a pamilia wenno 49,154 a tattao iti 173 a barangay ti naapektaran.
Di kumurang a 335 a balay ti nadadael bassit ken 25 ti naan-anay a nadadael. Idinto a nages-esen ti kaaduan a paset ti layus, nangato pay la ti danum iti dadduma a paset ti Brgy. iti ili ti Luna.
Nabotosan, baro nga opisial ti Ilocos Sur Provincial Capitol Press Corps
Mapaspasaran pay laeng ti kaawan ti koriente kadagiti ili ti Sudipen, Bangar, Balaoan, Luna, Bacnotan, San Gabriel, ken San Juan, idinto a 90 porsiento iti ili ti Bauang ken Siudad ti San Fernando ti awanan pay laeng iti koriente.
Agawan-awan wenno awan pay laeng ti koneksion ti internet iti Siudad ti San Fernando ken siam pay a kabangibangna nga ili, segun iti maysa nga staff ti Provincial Information Office.
Sitatalinaed iti red alert ti probinsia ken adda iti babaen ti state of calamity sipud pay idi Hulio 26.
Nasuspenso dagiti klase iti amin a lebel para ita a Lunes, Hulio 28, nupay immakar pay laeng dagiti kolehio iti asynchronous learning.
Awan pay ti naipadamag a natay agingga ita (Hulio 28).
Agtultuloy ti clearing operations, power restoration, ken relief operations.
Kabayatanna, nakaiwaras ti Department of Social Welfare and Development (DSWD) iti nasurok a 10,000 a family food packs, ready-to-eat food, ken non-food items kadagiti naapektaran a pamilia kas augmentation iti relief operations dagiti local government unit. (Hilda Austria/PNA)
