Idatag ni Presidente Ferdinand Marcos Jr. ti maikapat nga State of the Nation Address (SONA) ita nga aldaw, Hulio 28, a mangdakamat iti tren, rangtay, ken bagas--kas simbolo ti progreso ti administrasionna.
Adda itan ni Marcos iti gudua ti innem a tawen a terminona a kas presidente, ket sanguenna ti karit a mangtungpal kadagiti karina. Sumagmamano kadagiti natungpal a kari ti administrasionna ti naaramidanna iti transportasion, agrikultura, ken impraestruktura, nupay maar-aramid pay laeng ti dadduma, ken adda met naitantan.
Iti SONA ni Presidente Marcos idi napan a tawen, dinakamatna ti "panagrang-ay ti riles" a mangpabaro iti public transportation ken mangpalukay iti trapiko iti Metro Manila, mairaman ditoy dagiti kangrunaan a proyekto kas iti MRT-7, ti North-South Commuter Railway (NSCR), ti Metro Manila Subway, ken ti Mindanao Railway.
Maysa kadagiti nalatak, ken permi a nababalaw, a kari ni Presidente Marcos ti pannakaipababa ti presio ti bagas iti ₱20 kada kilo.
Kaso nga impeachment kontra ken ni Marcos, winaswas ti Kamara
Ngem idi Mayo 2025, inyusuat ti Department of Agriculture (DA) ken ti Office of the President (OP) ti “Benteng Bigas, Meron Na!” a nangirugi a nangiwayat iti programa a ₱20 kada kilo a bagas iti adu a paset ti pagilian.
Gapu ta ti impraestruktura ken kalsada ti maysa kadagiti kangrunaan a proyekto ti administrasion ni Marcos, pinabarona ti “Build, Build, Build” program ti napalabas nga administrasion ket pinagbalinna a “Build Better More” ket inkarina a mairingpas ken mapapardas ti pannakaaramid dagiti kalsada, rangtay, ken eropuerto.
Iti dagup ti 207 nga infrastructure flagship projects (IFP) nga inaprobaran ti Department of Economy, Planning, and Development (DEPDev), pito ti nalpasen, 74 ti maar-aramid, 34 ti naaprobaran a maipatungpal, siam ti agur-uray a maaprobaran, 41 a proyekto ti adda iti project preparation (proyekto a mayar-aramidan ti feasibility study), ken 42 ti adda iti pre-project preparation (mayar-aramidan iti pre-feasibility study).
Iti pakadagupan ti nagapuanan ni Presidente Marcos iti riles, bagas, ken kalsada, adda dagiti nagballigi, adda dandanin mairingpas, ken adda met dagiti naitantan.
Bayat nga idatag ni Presidente Marcos ti maikapat a SONA ita nga aldaw, ti karit ket saanen a maipapan iti panangipakaammo kadagiti baro a plano no di ket ad-adda iti panangipakita no kasano a matungtungpalen dagiti inkarina. (Argyll Cyrus Geducos/Manila Bulletin//Lito Hilidon/Bannawag)
