Saan nga ibilang ti Department of Labor and Employment (DOLE) a kasapulan a madagdagus ti linteg a ₱200 nga across-the-board a pannakaingato iti sueldo, ta ti Filipinas ti pagilian iti Southeast Asia nga addan iti kadakkelan a minimum wage.
Inyunay-unay ti Sekretario ti DOLE a ni Bienvenido Laguesma a ti regional wage board latta ti maitutop a mekanismo a mangikeddeng iti ngauan ti kabassitan a sueldo (minimum pay), nga agpaay a kas pangrugian a sueldo dagiti baro wenno unskilled workers.
No idilig kadagiti pagilian iti ASEAN, kinuna ni Lagdameo a nangaton ti minimum wage ti Filipinas ta umaboten iti ₱695, a dakdakkel ngem kadagiti adda iti Vietnam, Malaysia, Thailand, ken Indonesia.
Ti ₱50 a nginatuan ti sueldo nga inaprobaran ti Regional Tripartite Wages and Productivity Board idi Hulio 18 ket manamnama a pagnumaran ti agarup 1.2 a milion a mangmangged nga agsuelsueldo iti minimum iti National Capital Region, a mangnayon iti agarup ₱1,100 agingga iti ₱1,300 iti binulan a matgedanda.
Senado, pinasingkedanna ti ₱6.793-trilion a nailian a badiet para 2026
Nupay kasta, ilunglungalong latta dagiti grupo ti mangmangged ken dagiti mammanday-linteg ti ₱200 a panagngato, ta saanen nga umdas ti agdama a matgedan gapu iti agtultuloy a panagngina dagiti magatgatang.
Impakdaar ni Lagdameo a ti panagngato iti sueldo iti entero a pagilian ti mangted iti dadagsen kadagiti micro, small, and medium enterprises (MSMEs), a mangbukel iti 99 a porsiento dagiti negosio ken mangmangted iti trabaho iti 84 a porsiento ti workforce.
Nupay mabalin latta a pagsasaritaan ti panagngato ti sueldo kadagiti maaramid a pannakiuman kadagiti mangmangged, kinuna ni Laguesma nga ipamaysa ni Presidente Marcos Jr. ti imatangna iti parikut iti trabaho ken pannakasanay dagiti mangmangged iti maikapat a State of the Nation Address (SONA) ita nga aldaw, Hulio 28.
Impaganetget ti DOLE a ti panangikeddeng iti sueldo ket masapul a mangipakita iti kasasaad ti ekonomia iti rehion bayat a suportaranna ti pagimbagan dagiti mangmangged ken kinatalged ti negosio. (Trixee Rosel/Manila Bulletin//Lito Hilidon/Bannawag)
