Dinayaw ti grupo a napinget a mangitantandudo iti pagimbagan dagiti konsiumer ti sinao ni Presidente Ferdinand R. Marcos Jr. a tignay ti gobierno a maibusor kadagiti nangipaay iti saan a napintas a serbisio ti danum, agraman iti Siudad ti Bacolod.
Iti State of the Nation Address (SONA) ni Presidente Marcos idi Hulio 28, kinunana a personal nga inadalna ti report nga indatag ti Local Water Utilities Administration (LWUA), a mangipakpakita iti naruay a reklamo kontra kadagiti sumagmamano a water district ken ti pribado a partner-da, ket inkarina nga aksionanda dagiti nakabasol iti saan a napintas a serbisio ti danum.
"Padayawak ti kinuna ti presidente a nangibutaktak iti nakaay-ay-ay a kasasaad ti serbisio ti danum iti Filipinas. Patienmi a daytoy ti umuna nga addang iti pannakataming iti nabayagen a parikut iti danum," kuna ni Water Watch Advocates convenor Wennie Sancho ita nga aldaw, Hulio 29.
Lima a tawenen ti napalabas sipud idi nabukel ti joint venture agreement (JVA) iti nagbaetan ti Bacolod City Water District (Baciwa) ken PrimeWater, a nangipalubos iti kompania a kukua ti Villar Group a mangimaton iti operasion daytoy, ken adda investment pledge a PhP1.6 a bilion tapno mapapintas ti suplay ti danum iti siudad.
Senado, pinasingkedanna ti ₱6.793-trilion a nailian a badiet para 2026
Nupay kasta, saan a napintas a serbisio ken saan a napintas a kalidad ti danum ti sagsagrapen dagiti konsiumer iti dadduma a barangay agingga ita.
Idi Mayo, nangidatag ti Water Watch Advocates iti petision iti Presidente, a mangpawaswas iti JVA gapu ta nalibeg ken substandard ti kalidad ti danum a maal-alada, a mangdangran iti salun-at ken pagimbagan dagiti konsiumer.
Nangidatag met ni Sancho iti reklamo iti LWUA idi Hunio 16, a naawat ti ahensia idi Hunio 19.
Idi Hulio 14, insayangkat ti committee on energy and public utilities ti Bacolod City, nga idadauluan ni Councilor Roberto Roxas, ti public hearing, maibatay iti reklamo ken position paper nga indatag ni Sancho, a nangipasingked iti reklamona a maibusor iti PrimeWater Bacolod City. (Nanette Guadalquiver/PNA//Lito Hilidon/Bannawag)
