Kiniddaw ti Office of Public Counsel for Victims (OPCV) iti Pre-Trial Chamber I (PTC I) ti International Criminal Court (ICC) a saanda koma a patgan ti kiddaw ni dati a presidente Rodrigo Duterte a maitantan iti panagdesision ti PTC 1 mainaig iti panangkuestionar ti depensa iti hurisdiksion ti ICC.
Iti panangkuestion ti depensa iti hurisdiksion ti ICC iti kaso ni Duterte, kinunada nga awanen ti hurisdiksion ti ICC iti kaso gapu ta saanen a paset ti ICC ti Filipinas iti daydi a panawen.
Idi Hulio 22, kiniddaw ti depensa iti PTC 1 a maitantan koma ti desisionda iti isyu ti hurisdiksion gapu iti impormasion a naladaw a naalada.
Iti maysa a dokumento a naidatag idi Hulio 24, kinuna ni Principal Counsel Paolina Massidda nga awan ti pagibatayan ti kiddaw ti depensa iti umisu a proseso ken saan daytoy a maitunos iti interes dagiti biktima.
Nadaras a pannakairuar ti ayuda kadagiti naapektaran ti didigra, imbilin ni Marcos
Segun ken ni Massidda, awan epektona dagiti rason a dinakamat ti depensa iti kuestion iti hurisdiksion ti Korte kadagiti krimen iti war on drugs a naaramid iti Filipinas.
Kinuna ni Massidda a saan laeng a ni Duterte ti maapektaran iti pangngeddeng ti Korte, no di ket pay dagiti biktima, ken namakdaar a no maitantan ti panangdesisionda iti isyu ti hurisdiksion, apektaran daytoy dagiti mapasungad a kaso. (Raymund Antonio/Manila Bulletin//Lito Hilidon/Bannawag)
