Pinasingkedan ti Sandiganbayan ti hurisdiksionna kadagiti kaso a graft a naipila iti mapapati nga anomalous purchases iti ₱4.16 a bilion a gatad ti reverse transcription-polymerase chain reaction (RT-PCR) kits a para iti Department of Health (DOH) a mausar para iti COVID-19 idi 2020.
Adda tallo a panaglabsing iti Section 3(e) ti Republic Act No. 3019, Anti-Graft and Corrupt Practices Act, a naipila kontra kadagiti opisial ti Procurement Service (PS)-Department of Budget and Management (DBM) ken kadagiti opisial ti Pharmally Pharmaceutical Corporation.
Tallo a transaksion ti pakairamanan dagiti tallo a graft charge a ti umuna ket ti pananggatang iti 41,400 a yunit ti BGI Real Time Fluorescent RT-PCR Kits nga aggatad iti ₱2,877,300,000 idi Hunio 8, 2020; ti maikadua: 8,000 a yunit ti PCR Kit, BGI Real Time Fluorescent RT-PCR Kit nga aggatad iti ₱600,000,000 idi Abril 22, 2020; ken ti maikatlo: 2,000 a yunit ti A*Star Foundation Kit 2.0 nga aggatad iti ₱688,000,000 idi Abril 22, 2020.
Dagiti opisial a naidarum: dati a PS-DBM Undersecretary Christopher Lloyd A. Lao, Overall Deputy Ombudsman Warren Rex H. Liong, Direktor IV Christine Maria Lecaros Suntay, Procurement Management Officer V Webster Marmol Laurenana, Procurement Management Officer Paul Jasper Villanueva De Guzman, Procurement Management Officer VI Augusto Menchavez Ylagan, ken Division Chief ti Procurement Division VI Jasonmer Lagarto Uayan.
Nadaras a pannakairuar ti ayuda kadagiti naapektaran ti didigra, imbilin ni Marcos
Nairaman met iti darum dagiti opisial ti Pharmally a da Presidente ken Direktor Twinkle Dargani, Treasurer ken Secretary Mohit Dargani, Direktor Linconn Uy Ong, Direktor Justine Garado, Board Member Huang Tzu Yen, Financial Manager Lin Weixiong, ken empleado a ni Krizzle Grace Ukkong Mago.
Namindua nga in-dismiss ti Regional Trial Court (RTC) dagiti kaso gapu iti kinakurang ti hurisdiksion--umuna babaen ti RTC-Manila, sa sumaruno babaen ti RTC-Malolos.
Iti biang ti RTC-Malolos, inkeddengna a saan a mairaman dagiti kaso kadagiti "minor" a kaso a bistaen dagiti regional trial court nangruna ta ₱4,165,300,000 ti gatad a nairaman. Impaulogna ti dua a nagsina a bilin--umuna, ma-dismiss dagiti kaso nga awan ti prejudice gapu iti kinakurang ti hurisdiksion, ken maikadua, saan a mapatgan ti motion for reconsideration ti prosekusion.
Binabalaw ti Office of the Ombudsman (OMB), babaen ti Office of the Special Prosecutor, ti pannaka-dismiss ti kaso ken kinunana a liniklikan ti RTC-Malolos ti pagrebbenganna a dumngeg, mangusig, ken mangeddeng kadagiti kaso.
Nangipila ti OMB iti petition for certiorari iti Sandiganbayan ken kiniddawna iti anti-graft court a bilinenna ti RTC-Malolos a mangituloy ti pannakabista dagiti tallo a kaso a kriminal.
Saan a pinatgan ti Sandiganbayan ti petision ti OMB, kinunana a saan a sinalungasing ti RTC-Malolos ti linia ti grave abuse of discretion.
Kinunana: "Imbes ketdi, umisu nga inkeddengna a saan a kalikaguman ti Republic Act No. 10660 a ti pannakadadael ket nasken nga elemento ti krimen tapno bigbigen ti Sandiganbayan dagiti kaso. Umisu pay nga inkeddengna a dagiti gatad a nairaman ket saan laeng nga insidente ti pannakaiparangarang ti material facts dagiti kaso no di ket mangiladawan iti kinadagsen ti naglabsingan a nakaidaruman dagiti accused-respondent ken ti pannakadadael a naparnuayna iti gobierno."
Gapuna, inkeddeng ti Sandiganbayan a “ti Sandiganbayan ti addaan iti hurisdiksion kadagiti krimen a nakaidaruman.”
Ni Chairperson Associate Justice Ma. Theresa Dolores C. Gomez-Estoesta ti nangisurat iti 43 a panid a resolusion, a sinarurongan da Associate Jurice Georgina D. Hidalgo ken Associate Justice Zaldy V. Trespeses. (Czarina Nicole Ong Ki/MANILA BULLETIN)
