NAruaginen ti ₱368 a milion Caba-Luta-Ponghal-Buyabuyan farm-to-market road iti probinsia ti Ifugao, nga addaan iti rangtay, ken manamnama a mangparang-ay iti agricultural activities ti walo a farming communities ken pakabenepisiaran ti nasurok 3,800 a mannalon.
Kinuna ni Jennilyn Dawayan, regional director ti Department of Agriculture (DA) iti Cordillera Administrative Region (CAR), idi Agosto 1, a ti pannakaileppas ti proyekto ket manamnama a mangparang-ay iti produktibidad ti agrikultura ken mangpapigsa iti operasion dagiti agdama a coffee enterprises.
“Adu dagiti aktibidad ti panagpataud iti kape iti lugar ken namnamaenmi a mapasayaat ti pagdalanan dagiti mannalon a mapan iti merkado," kinunana.
Ti pannakapasayaat ti farm-to-market road nga addaan iti rangtay iti Lagawe, Ifugao ket maysa a sub-project ti Department of Agriculture–Philippine Rural Development Project (DA-PRDP) Scale-Up a naisingasing iti napalabas nga administrasion ti gobierno munisipal ti Lagawe.
Nabotosan, baro nga opisial ti Ilocos Sur Provincial Capitol Press Corps
Naangay ti groundbreaking ti proyekto idi Hulio 30.
“Maysa daytoy a napagtitinnulongan a responsibilidad. Manipud rugi agingga iti ngudo, kasapulan nga agtitinnulong ti komunidad, dagiti opisial, ti kontraktor, ken ti DA-PRDP tapno mabantayan ti proyekto, masigurado ti kalidadna, ken masigurado a maileppas daytoy segun kadagiti pagalagadan ken iti eskediul,” kinuna ni Dawayan.
"Pimmayso a tagtagainep," kinuna ni Vice Governor Martin Habawel Jr., a nangisingasing iti proyekto iti DA-PRDP idi isu ti mayor ti Lagawe.
Kinuna met ni Mayor ti Lagawe Leslie Roy Nayahangan a dakkel a parabur ti nasao nga inisiatiba para iti Lagawe agsipud ta matungpal ti naan-anay a potensialna babaen ti umno a pannakaipatungpal ken pannakapadur-as dagiti komplementario a proyekto. (Liza Agoot/PNA)
