Gatas isprey. Iti maysa a galon a danum, ilaok ti dua a tasa a gatas. Yisprey daytoy kadagiti mula a pipino, karabasa, letsugas ken kamatis. Nasamay daytoy a pangontra kadagiti buot nga agparnuay iti sabali ken kaarngina a sakit a managan iti downy mildew, ken ‘tay nangisit nga impeksion a managan iti turikturik.
Copper-based fungicide. Epektibo ti copper-based fungicide a mangsaluad iti impeksion dagiti mula kontra kadagiti buot. No mayisprey daytoy, kalupkopanna ti bulong dagiti mula ket salaknibanna daytoy kontra iti panagatake dagiti makadadael nga organismo nga agyakar iti sakit.
Maysa pay a naidumduma nga akem ti copper ket isu ti panangtulongna iti mula tapno rumegta dagiti electrons nga isu ti kasapulanna tapno maalana ti umdas a kasapulanna nga enerhia manipud iti init nga isu met ti kasapulanna iti proseso ti photosynthesis.
Saan laeng a milmilkat ti kabaelan a kontrolen ti copper-based fungicide ta iramanna pay a paksiaten ti sakit a turikturik kadagiti patatas (potato late blight), kamatis (tomato blight), panaglungtot ti lasona (purple blotch), panaglungtot ti repolio (black rot), ken panaglungtot ti bulong ti carrot (cercospora leaf spot).
Saan a Basta Mani ti Imulam, Pari
Mabalin nga ipasuyot ti copper-based fungicide iti bulong dagiti mula kas iti wagas nga ar-aramiden no agisprey iti foliar fertilizer. No saan, yisprey iti daga a pagpatubuan kadagiti bin-i tapno agserbi daytoy a pannakabakuna dagiti mula wenno wagas a panangdalus (sterilization) iti daga tapno matay dagiti makadadael nga organismo a manamnama a nagumok iti daga. No met panawen nga isagsagana ti talon, mabalin nga ilaok ti copper-based fungicide iti organiko nga abono nga usaren kas pondo a ganagan.
Tubbog ti amarilio a laya. Malaksid kadagitoy, nasamay pay a pangpaksiat iti milmilkat tubbog ti amarilio a laya, bawang, ken sabila. Saan laeng a milmilkat ngem nasamay pay ti tubbogda a pangpaksiat iti igges ti bunga ti kamatis (tomato fruitworms) ulmog, ayam, ken dangaw.
Naduktalan daytoy dagiti agsuksukisok manipud iti Mariano Marcos State University (MMSU) iti Siudad ti Batac iti inwayatda a panagsukisok.
Tapno makontrol ti nasapa nga ikakapet ti tomato blight, paglaoken ti tubbog ti bawang, amarilio a laya, ken sabila (aloe vera). Paglaoken ti 15-20 a kutsara dagitoy napaglalaok a templa iti 16 a litro a danum sa yisprey kadagiti mula 30 nga aldaw kalpasan ti panagmula. Uliten ti agisprey iti kada 5-7 nga aldaw. --O
