Impaganetget ni Senador Erwin Tulfo ti panangsuportarna iti posible a pannakabalbaliw iti pannakaipatungpal iti Republic Act No. 11310, ti linteg a nangipasdek iti Pantawid Pamilyang Pilipino Program (4Ps).
Daytoy ti kinuna ni Tulfo kalpasan ti pannakiumanna ken ni Sekretario ti Department of Social Welfare and Development (DSWD) Rex Gatchalian idi Hulio 31, dua nga aldaw kalpasan ti pannakadutokna a daulo ti Senate Committee on Social Justice, Welfare, and Rural Development
Segun ken ni Tulfo, adda inted ti DSWD kenkuana a singasing a pannakabalbaliw iti 4Ps a dinakamat ni Presidente Marcos iti SONA, ket napintas dagiti insingasing ni Gatchalian.
Maysa kadagiti adalen ni Tulfo ti bilang dagiti agbalin a benepisiario ti 4Ps nga ik-ikkan ti gobierno iti cash grant nupay simmayaaten ti biagda.
Nadaras a pannakairuar ti ayuda kadagiti naapektaran ti didigra, imbilin ni Marcos
Kinuna ni Tulfo a kayat a talaga ti presidente nga adalen ta naabuso daytoy, idinto nga adda dagiti nagsuroken ti panawenda ket adu pay dagiti adda iti waiting list.
Malaksid iti daytoy, insingasing ti DSWD a maikkat koma ti agdama a pito a tawen a limitasion dagiti benepisiario nga umawat iti tulong pinansial manipud it gobierno.
Kinuna ni Gatchalian a no saan a maamendaran ti linteg ti 4Ps, 2.4 a milion a benepisiario ti kapilitan a maikkat iti programa uray di pay simmayaat ti panagbiagda. (Dhel Nazario/Manila Bulletin//Lito Hilidon/Bannawag)
