Saan a panagsukir, no di ket maitunos iti panangaywan iti Konstitusion.
Daytoy ti kapanunotan ni House Speaker Martin Romualdez iti motion for reconsideration (MR) nga impila ti Kamara ita nga aldaw, Agosto 4, mainaig iti pangngeddeng ti Korte Suprema (SC) nga "unconstitutional" ti kaso nga impeachment ni Bise Presidente Sara Duterte.
"Saan a panangsukir wenno kinaawan panagraem daytoy. No di ket maysa a tignay a mangaywan iti Konstitusion--pammatalged a tunggal sanga ti gobierno ket rumbeng nga agtignay a maitunos iti Konstitusion a nangted iti turay kadatayo amin," kinuna ni Romualdez a presidente ti Lakas-Christian Muslim Democrats (Lakas-CMD).
Ti impeachment complaint--a winaswas ti SC gapu iti teknikalidad--ket naggapu iti Kamara idi Pebrero 5.
Kaso nga impeachment kontra ken ni Marcos, winaswas ti Kamara
Ti Office of the Secretary General (OSG) ti mangibagi iti Kamara iti kaso a naidatag iti SC, a nagtaud iti petition to dismiss nga impila ti kampo ni Duterte. (Ellson Quismorio/Manila Bulletin//Lito Hilidon/Bannawag)
