Dinagadag ni Sendor Francis “Kiko” Pangilinan ti Department of Agriculture (DA) a maipaay koma met kadagiti probinsia dagiti extension service-da, nga asistiranda dagiti mannalon iti probinsia a "makaraman met" iti tulong ti gobierno iti sektor ti agrikultura.
Iti pannakiumanna iti executive committee ti University of the Philippines-Los Baños (UPLB) idi Sabado, Agosto 2, inggunamgunam ti senador a masapul ti naurnos ken naorganisar ti grupo dagiti mannalon a makagun-od iti nasken a programa ti gobierno kas iti pinansial, mechanization, post-harvest facilities, crop insurance, ken koneksion iti merkado.
Nalidayan ni Pangilinan gapu ta addaan laeng iti regional office ti DA iti agdama, ken ti Region 4A (Calabarzon) ket sakupen ti regional office ti DA iti Lipa, Batangas.
Kinuna ni Pangilinan a panawenen a papigsaen ken urnosen ti gobierno dagiti mannalon kas maysa a kooperatiba tapno masigurado a naan-anay a mausar dagiti ipaay a tulong ti gobierno iti tay-ak ti agrikultura ken mapasayaat ti apit dagiti mannalon.
Kaso nga impeachment kontra ken ni Marcos, winaswas ti Kamara
Patien ni Pangilinan nga agpannuray ti balligi ti programa iti agrikultura iti kabaelan dagiti gunglo dagiti mannalon a mairaman iti programa ti gobierno, ta saan a mapagnumaran dagiti mannalon dagiti teknolohia ken ania man a tulong ti gobierno no saanda a maorganisar ken mapapigsa.
Dinakamat ni Pangilinan a pagarigan ti napaliiwna idi simmarungkar iti Taiwan a 45-ektaria ti kalawana a taltalon nga addaan iti kabaruanan a cold storage facility a pagandaren ti init, ken alikamen a mangpataud iti organic fertilizer, ket imatmatonan daytoy ti kooperatiba nga addaan 24 a kamengna.
Ni Pangilinan ti daulo ti Committee on Agriculture, Food and Agrarian Reform iti Senado. (Hannah L. Torregoza/Manila Bulletin//Lito Hilidon/Bannawag)
