Inanamongan ti 19 a senador a maidulin (mai-archive) iti rekord ti Senado ti articles of impeachment kontra ken ni Bise Presidente Sara Duterte, kas panangraemda iti desision ti Korte Suprema (SC) a nangideklarar nga "unconstitutional" ti proseso ti impeachment nga inaramid ti Kamara.
Kalpasan ti panagdidiskutir dagiti senador iti mosion ni Senador Rodante Marcoleta a mang-dismiss iti impeachment complaint ni Duterte, nagbobotosanda ketdi ti pannakaidulin dagiti dokumento ti impeachment complaint a naawatda idi Pebrero 5.
Naamendaran ti mosion ni Marcoleta a kas "adhering to the immediately executory decision rendered by the Supreme Court En Banc on 25th July, 2025 which held among others that the Articles of Impeachment are null and void ab initio and that the Senate did not acquire jurisdiction over the same."
Daytoy a mosion ti opisial a nangyallatiw iti articles of impeachment iti archive ti Senado.
44% kadagiti Filipino, mangnamnama iti nasaysayaat a kalidad ti panagbiag iti 2026 —SWS
Immanamong iti naamendaran a mosion ni Marcoleta da Senador Alan Peter Cayetano, Pia Cayetano, Ronald Dela Rosa, JV Ejercito, Francis Escudero, Jinggoy Estrada, Sherwin Gatchalian, Bong Go, Lito Lapid, Loren Legarda, Rodante Marcoleta, Imee Marcos, Robin Padilla, Erwin Tulfo, Raffy Tulfo, Joel Villanueva, Camille Villar, Mark Villar, ken Miguel Zubiri.
Simmupiat da Senador Bam Aquino, Risa Hontiveros, Kiko Pangilinan, ken Tito Sotto gapu ta kayatda nga urayen ti pagbanagan ti indatag ti Kamara a motion for reconsideration iti Korte Suprema.
Nag-abstain ni Senador Ping Lacson ket kinunana a masapul nga urayen ti Senado ti pagbanagan ti motion for reconsideration nga impila ti Kamara.
Inlawlawag ni Sen. Alan Cayetano a "natayen" ti impeachment case kontra ken ni Duterte, malaksid no ibabawi ti Korte Suprema ti bukodda a desision.
Sakbay daytoy, sinupiat dagiti 19 a senador ti mosion ni Senate Minority Leader Tito Sotto III a mangitantan (on table) iti mosion ni Marcoleta. Lima a senador ti immanamong iti dayta a mosion ni Sotto.
Inlawlawag ni Sotto nga adda nakapila a motion for reconsideration iti desision ti SC, ket nasakbay unay no agdesisiondan nga idulin wenno i-dismiss ti impeachment complaint. Patien ni Sotto nga iti kanito a maipan ti impeachment complaint iti archive ti Senado, maibilang a "natayen" daytoy. (Dhel Nazario and Hannah L. Torregoza/Manila Bulletin//Lito Hilidon/Bannawag)
