No adda mapabasol iti pannakarsuod ti ₱1.2 a billion a Cabagan-Santa Maria Bridge iti Isabela, saan a ti drayber ti trak a dimmalan iti rangtay, segun iti sumagmamano a senador.
Iti privilege speech-na, binigbig ni Senate President Pro Tempore Jinggoy Estrada ti tallo nga opisial manipud iti Department of Public Works and Highways (DPWH) a mapapati a makaigapu iti pannakarsuod ti nasao a rangtay.
Iti maysa a press conference ita a Huebes, Agosto 7, naasian met ni Senador Imee Marcos iti drayber ti trak a mapabpabasol iti nasao nga insidente. Kinuna ni Marcos nga addan problema ti rangtay sipud pay.
"Nagbayag daytoyen, di kad' idi pay 2013 a narugian, sa pagammuan ti laeng akimbasol ket 'diay truck driver, saan met siguro a kasdiay," kinunana.
Nadaras a pannakairuar ti ayuda kadagiti naapektaran ti didigra, imbilin ni Marcos
Nakompleto laeng idi Pebrero 1, 2025 ti rangtay, ket narba kalpasan laeng ti 26 nga aldaw, idi Pebrero 27, 2025.
Idi Agosto 4, naipalgak ti kinasiasino dagiti opisial ti DPWH kalpasan a nagsaludsod ni Senador Rodante Marcoleta ken ni Estrada bayat ti privileged speech-na.
Mairaman kadagiti opisial a dinakamat ni Estrada da Undersecretary for Regional Operations in Luzon Eugenio Pipo Jr., Undersecretary for Regional Operations in Visayas and Mindanao Ador Canlas, ken Undersecretary for Planning Service and Public-Private Partnership Service Maria Catalina Cabral.
“Nalabit a ti binagaan ti Presidente iti 'agbainkayo met', panagkunak ket isuda dagitoy opisial ti DPWH a nairaman wenno kakomplot iti konstruksion ti narsuod a rangtay iti Isabela,” kinuna ni Estrada.
Kinuna pay a nupay napakdaaranen dagiti inheniero ti ahensia (DPWH) maipapan iti potensial a pannakarsuod ti rangtay, kasla saan a naipangag dagitoy a pakdaar.
Malaksid kadagiti undersecretary, dinakamat pay ni Estrada ni Assistant Secretary for Regional Operations in Luzon Loreta Malaluan ken Assistant Secretary for Regional Operations in Visayas and Mindanao Mary Bueno, nga addaan met iti pannakainaig iti nasao a proyekto.
Impaganetget ni Estrada a ti accountability ket rumbeng a saan la nga iti drayber ti trak, dagiti konsultant iti disenio, ken dagiti kontraktor. Kiniddawna a mapasungbat dagiti opisial a respomsable iti panagplano, panangaprobar, ken panangimaton iti proyekto.
“Awan ti nadamagmi a nasuspenso nga opisial ti DPWH nga adda pakainaiganna iti daytoy a proyekto. Awan met nadamagmi a naimbestigarda tapno agsungbatda," kinunana.
Segun ken ni Estrada, rumbeng ng agsungbat dagiti DPWH personnel babaen ti panangtiliw kadagiti opisial a nairaman iti panagplano, panangaprobar, ken pannakaipatungpal ti proyekto, ket saan la koma nga agpokus iti panangpasungbat kadagiti pribado a kontraktor. (Dhel Nazario/MANILA BULLETIN)
