Patien ni Manila 3rd district Rep. Joel Chua a ti pannakaidulin (pannaka-archive) ti impeachment complaint kontra ken ni Bise Presidente Sara Duterte iti Senado ket saan pay a maibilang a "checkmate" wenno nalpasen.
Kinuna daytoy ni Chua kalpasan nga inibbatan ti Senado ti kaso nga impeachment nga impaulog ti Kamara, idi Agosto 6.
Babaen ti botos a 19-4-1 (yes-no-abstain), inanamongan ti Senado ti mosion ni Senador Rodante Marcoleta iti plenario a mangidulin (archive) iti impeachment complaint, kalpasan nga ideklarar ti Korte Suprema nga "unconstitutional" daytoy, idi Hulio 25.
Kayat ni Marcoleta a ma-dismiss a dagus ti kaso nga impeachment ngem immanamong met laeng daytoy iti kompromiso a "motion to archive" kalpasan ti panangsupiat ni Senador Panfilo "Ping" Lacson ket kinunana nga awan ti "motion to dismiss" iti plenario.
Pannakaimbestigar ti mining permit iti Dupax del Norte, kiniddaw ni Sen. Pangilinan
Segun ken ni Chua, saan a mapengdan ti Kamara iti tarigagayda a mangpasungbat kadagiti nakabasol, ket saan pay a makuna a "checkmate" ti tignay ti Senado.
Innayon ni Chua nga adu pay ti aramidenda a panagtignay tapno maituloy ti panangilungalongda iti hustisia ken accountability.
Dagiti linaon ti articles of impeachment -- kangrunaan ti maipagarup a di umisu a pannakausar ti confidential fund a ₱612.5 a milion -- ket naibatay iti natakuatan ti Committee on Government and Public Accountability nga indauluan ni Chua iti maika-19 a Kongreso.
Nagtalinaed ni Chua a daulo ti nasao a komite iti maika-20 a Kongreso. (Ellson Quismorio/Manila Bulletin//Lito Hilidon/Bannawag)
