Mabalin nga adda pagsayaatan iti panangidulin (pannaka-archive) ti Senado iti impeachment complaint nga impila ti Kamara kontra ken ni Bise Presidente Sara Duterte.
Daytoy ti kinuna ni Mamamayang Liberal (ML) Party-list Rep. Leila de Lima iti maysa nga interbiu idi Agosto 7, maysa nga aldaw kalpasan a nagdesision ti Senado a maidulin ti kaso nga impeachment ni Duterte iti rekord ti Senado.
Babaen ti botos a 19-4-1 (yes-no-abstain), nagdesision dagiti senador iti pannaka-archive ti impeachment nupay adda impila ti Kamara ken dadduma pay a maseknan a motion for reconsideration (MR) iti pangngeddeng ti Korte Suprema (SC) a nangideklarar nga unconstitutional ti articles of impeachment (AOI).
Segun ken ni De Lima, nupay saanda nga umanamong iti desision ti Senado, dinakamatna ti kinuna ni dati a Justice Antonio Carpio a ti pannaka-archive ti AOI ket mangted iti gundaway iti SC a mangbaliw iti desisionda iti impeachment.
Kaso nga impeachment kontra ken ni Marcos, winaswas ti Kamara
Kinuna ni De Lima a no winaswas ti Senado ti impeachment complaint, daytoy ti mangitunda iti saanen a panangbaliw ti SC iti desisionda gapu ta agbalinen a "moot" wenno awanen mamaay ti kaso. (Ellson Quismorio/Manila Bulletin//Lito Hilidon/Bannawag)
