Pormal a kiniddaw ni dati a presidente Rodrigo Duterte iti International Criminal Court (ICC) ti pannakadiskualipikar ni Chief Prosecutor Karim Khan ken maparitanen a makibiang iti kaso kontra kenkuana, gapu iti mapapati a nakaro a "conflict of interest” ken panangabuso iti proseso.
Iti maysa a dokumento a naipila idi Agosto 7 nga impablaak ti Appeal Chamber ti ICC, kiniddawda a masapul a madiskualipikar a dagus ni Khan gapu iti panagpaayna idi a kas abogado dagiti di nainaganan a biktima ti drug war iti Filipinas sakbay a nagbalin a prosecutor ti ICC.
Segun iti abogado ni Duterte a ni Nicholas Kaufman, maibilang a "conflict of interest” ken pananglabsing iti annongen ti ICC nga impartiality ti saan a panangideklarar ni Khan iti panagpaayna idi a kas abogado dagiti biktima.
Kinuna ni Kaufman a pribado nga abogado ni Khan idi 2018 ket isu ti nangibagi kadagiti biktima ti war on drugs iti Filipinas ket nangusar iti impormasion manipud iti dayta a nagakmanna idi indauluanna ti panagimbestigar ti ICC iti kaso ni Duterte.
Nadaras a pannakairuar ti ayuda kadagiti naapektaran ti didigra, imbilin ni Marcos
Maibatay iti paglintegan ti ICC, maiparit iti maysa a prosecutor a makibiang iti ania man a kaso a mabalin a mangpataud iti panagduadua iti kinapatasda, nangruna no adda pakairamananda iti maysa a legal a proseso.
Innayon ni Kaufman a matingitingto ti namulitan a kinasin-aw ti imbestigasion a maibusor ken ni Duterte iti maangay a confirmation of charges hearing a maangay inton Septiembre 23. (Argyll Cyrus Geducos/Manila Bulletin//Lito Hilidon/Bannawag)
