Inaklon ni Senador Panfilo Lacson ita nga aldaw, Agosto 8, a bimmaba ti panagtalek ken performance rating ti Senado gapu iti panangsupiat ti publiko iti kontrobersial a budget insertion ken ti panangtaming iti kaso nga impeachment ni Bise Presidente Sara Duterte.
Iti maysa a waragawag, kinuna ni Lacson a ti pannakakita ti publiko iti panagkunniber -- agraman ti mapapati a “pork barrel” wenno panangisingit ti bicameral conference committee (bicam) iti badiet dagiti sumagmamano a mammanday linteg -- ti makagapu iti panagbaba ti rikna ti publiko iti Senado.
"Dayta ngamin ti makitkita ti publiko ket mabasbasada iti inaldaw. Adu ti mabalin a makaapektar isu nga agannadtayo," kuna ni Lacson.
Maibatay iti surbey nga insayangkat ti Octa Research manipud Hulio 12 agingga 17, bimmaba ti trust rating ti Senado manipud 57 a porsiento ket nagbalin a 49 a porsiento, kasta met ti performance rating-da manipud 53 a porsiento, ket nagbalin a 47 a porsiento.
Nadaras a pannakairuar ti ayuda kadagiti naapektaran ti didigra, imbilin ni Marcos
Segun ken ni Lacson, naigiddan ti surbey iti report a ₱142 a bilion a balor ti maisingit a pondo iti bicam a pakairamanan ti Senado, ken ti pannakaidulin ti kaso nga impeachment kontra ken ni Duterte.
Iti laksid dagitoy a karit, manginanama ni Lacson a dagiti kaudian a sayangkatda a mangitandudo iti transparency, kas iti pannakailukat ti bicam conference iti publiko, ket mabalin a maisubli ti panagtalek dagiti umili.
Innayon ni Lacson nga itultuloyna a repasuen ti national budget, nangruna iti panangdillaw kadagiti mapagduaduaan a flood control project. (Wilnard Bacelonia/PNA/Lito Hilidon/Bannawag)
