Nadangran ti tallo a soldado kalpasan a rimmaut dagiti armado a lallaki iti maysa a Philippine Army (PA) base iti Siudad ti Lamitan, Basilan, kuna ti militar ita nga aldaw, Agosto 8.
Segun iti report ti militar, pinalpaltogan dagiti di pay nabigbig a lallaki ti headquarters ti 18th Infantry Battalion (18IB) iti Brgy. Campo Uno, Lamitan City idi rabii ti Agosto 6. Ti 18IB ket imatmatonan ti 101st Infantry Brigade (101IBde) ti 11th Infantry Division (11ID).
Limmaban dagiti soldado ket nagrurupakda iti las-ud ti 20 a minuto a nakadangran ti tallo a soldado.
Kinuna ni Colonel Frederick M. Sales, acting commander ti 101IBde, nga aramid ti takrot ti ginagara a panangrautda kadagiti soldado, ket nalawag a panggepda a dadaelen ti talna ken talged a nagun-odda iti Basilan.
Nadaras a pannakairuar ti ayuda kadagiti naapektaran ti didigra, imbilin ni Marcos
Impangato ti 101IBde ti seguridad iti Lamitan ket naalarma dagiti soldado iti full alert kalpasan ti insidente.
Addan naibaon a soldado a mangsawar kadagiti suspek.
Saan pay nga ammo ti militar ti motibo ken pakabigbigan dagiti rimmaut.
Iti sabali a bangir, nasayaaten ti kasasaad dagiti tallo a soldado a nadangran kalpasan a naitaray ida iti ospital. (Martin Sadongdong/Manila Bulletin//Lito Hilidon/Bannawag)
