Agtultuloy ti panangisayangkat ti Department of Public Works and Highways iti declogging kadagiti drainage system, kas iti igid ti Timog Avenue iti Quezon City idi Agosto 5, 2025. Ti kadakkelan a siudad ti National Capital Region iti benneg ti populasion, ti Quezon City, ket nairaman met kadagiti lugar a kaaduan a naapektaran ti layus gapu iti abagat ken agsasaruno a bagyo idi Hulio. (Joan Bondoc/PNA)

Awan ti idumduma ni Presidente Ferdinand R. Marcos Jr. nga asino man iti imbestigasion kadagiti naanomalia a flood control project iti pagilian, kinuna ti Malakanyang idi Martes, Agosto 12.

Iti pannakisaritana kadagiti reporter, kinuna ni Palace Press Officer Claire Castro a siguraduen ti administrasion ni Marcos a maipaay ti pannusa kadagiti kontraktor wenno uray asino man a nasinged iti presidente a masarakan a nairaman kadagiti iregularidad kadagiti proyekto a mangkontrol iti panaglayus.

"Uray napateg kenkuana, uray gayyemna, saan nga idumduma ti Presidente ti asino man. Agsungbat dagiti rebbengna nga agsungbat,” kinuna ni Castro.

Segun ken ni Castro, saan a paset ti Department of Public Works and Highways (DPWH) iti grupo a mangimbestigar, ket impaganetgetna a ti akem ti ahensia iti agtultuloy nga imbestigasion ket limitado iti panangipaay iti impormasion maipapan kadagiti proyekto a panangkontrol iti layus.

Nasional

Senado, pinasingkedanna ti ₱6.793-trilion a nailian a badiet para 2026

Iti laksid dagiti makapaalarmar a bambanag a naduktalan iti pannakaited kadagiti flood control project, agtaltalek pay laeng ni Marcos ken ni DPWH Secretary Manuel Bonoan, kinuna ni Castro.

Iti press conference idi Lunes, Agosto 11, impalgak ni Marcos a 15 a kontraktor ti nakaala iti dandani 20 a porsiento iti dagup a ₱545.64 a billion a nailatang iti programa ti gobierno a panangkontrol iti layus.

Napaliiw pay ni Marcos dagiti saan a panagtutunos kadagiti top 10 a probinsia nga addaan iti kaaduan a proyekto a panangkontrol iti layus, a kunana a dadduma kadagitoy ket lugar a saan met a nalaka a malayus.

Segun iti damo a report ti DPWH, agarup 6,021 kadagiti 9,855 a flood control project manipud Hulio 2022 agingga iti Mayo 2025 ti addaan iti proyekto a nasurok a ₱350 a billion nga awan ti espesipiko a detalye no ania ti kita dagiti estruktura a mabangbangon, matarimaan, wenno ma-rehabilitate.

Inlawlawag ni Castro a saan a ma-blacklist dagiti 15 a kontraktor, bayat ti pannakaur-uray ti resulta ti imbestigasion. (Ruth Abbey Gita-Carlos/PNA)