Binallaagan ti Department of Health (DOH) ti publiko ita nga aldaw, Agosto 14, kadagiti agwarwaras a palso a text message nga agpampammarang a naggapu iti DOH ken mangikarkari iti maipagarup a nasurok a naibayadda iti ospital a mabalin nga i-refund.
Iti kallabes, adda dagiti nagipulong nakaawatda iti text message nga agkunkuna a naggapu iti DOH ken adda maalada a ₱8,000 manipud iti “DOH zero billing plan" ken nagutigotda a mangiklik iti mapagduaduaan a link tapno maalada ti refund.
Segun iti DOH, saanda a mangipatulod iti link iti publiko, kasta met dagiti ospital, ket dinagadagda ti publiko a saanda nga iklik dagiti mapagduaduaan a link kadagiti scam a text message.
Kinuna ti DOH a ti legal a benepisio iti babaen ti “Bayad na Bill Mo” wenno “No Balance Billing” program ket awan bayadna para kadagiti kangrunaan a serbisio ken accommodation iti amin nga ospital ti DOH iti pagilian.
Ombudsman Remulla, paspasungbaten ti Korte Suprema iti petision ni Zaldy Co
Pinakdaaran ti DOH ti publiko nga agridam kadagit maawat a text message, ta dagitoy a wagas ti kadawyan nga agusar iti kasla lehitimo a nagan ken mangidiaya iti inuulbod a kari tapno allilawenda dagiti biktimada a mangiklik iti napeggad a link wenno mangipaay iti personal nga impormasionda.
Imbalakad ti DOH kadagiti Filipino a beripikarenda nga umuna dagiti impormasion iti opisial a website ken social media account sakbay a patien wenno aramiden ti ibagbaga ti text message, kas pangliklik iti pannaka-scam. (Jel Santos/Manila Bulletin//Lito Hilidon/Bannawag)
