Nasaripatpatan ti Philippine Eagle Foundation (PEF) ti agassawa nga atap ken awanan marka a Philippine Eagle iti kataltalonan ti Bukidnon itay napan a lawas.
Segun iti PEF, daytoy ti kompirmado a pannakakitada iti Philippne Eagle iti las-ud ti dandani dua a dekada. Saan a naipalgak ti eksakto a yan dagiti agila para iti kinatalgedda, ngem kinuna ti PEF nga iti ikub ti Buhita (Bukidnon Higaonon Tribal Association) ancestral domain ti nakakitaanda kadagiti agila.
Kinuna ti PEF nga aggidgiddan a tumaytayab dagiti dua nga agila, ta pagiliasinan ti ritual ti panagarem ti agabay a panagtayab dagiti dua nga agasmang.
"Sangsangkamaysa a markaanda iti teritorioda bayat a pasingkedanda manen ti singgalutda. Napintas ken nabileg a sala dayta iti tangatang, a mangipasimudaag a mabalin nga adda baro a panawen ti panagumok iti masanguanan,” kinuna ti PEF.
Pannakaimbestigar ti mining permit iti Dupax del Norte, kiniddaw ni Sen. Pangilinan
Segun ken ni Dr. Jayson Ibañez, Director for Operations ti PEF, iti naudi a pannakaimatangda iti agasmang nga agila ken iti sagiboda a pinatalgedan ti PEF ken Department of Environment and Natural Resources (DENR) iti daga dagiti Buhita ket idi 1996.
Kinuna ni Ibañez a bunga daytoy ti insayangkatda a makabulan nga ekspedision ti maysa a grupo a buklen ti PEF, DENR, ken dagiti lokal a boluntario.
Kinuna ni Ibañez a nagballigi ti insayangkatda gapu iti tulong dagiti daulo ken panglakayen ti Buhita ancestral domain a mangtaginayon iti kabakiran a nagnumaran dagiti atap nga ayup ken tattao.
Kasapulan ti agasmang a Philippine Eagle ti agarup 4,000 agingga iti 11,000 nga ektaria a kabakiran tapno agbiagda, segun iti kaadu ti agbalin a taraonda iti lugar.
Innayon ti PEF a naimbag a pagilasinan ti kaadda dagiti agassawa nga agila ta kaipapananna nga ikarkarigatanda latta ti agbiag iti bakir, ket masapul a tungpalen ti tao ti annongenna a mangpaadu kadakuada. (Keith Bacongco/Manila Bulletin//Lito Hilidon/Bannawag)
