Maiwarwaras iti amin a social media platform dagiti bideo ti krimen a napasamak iti ballasiw-taaw--ken uray dagiti napasamak iti pagilian--a naglaon iti fake news wenno palso nga impormasion tapno agparang a nakaro unayen ti parikut iti peace and order iti Filipinas, segun iti imbutaktak ti Philippine National Police (PNP) ita nga aldaw, Agosto 18.
Kinuna ni PNP chief Gen. Nicolas Torre III a dagiti DDS vlogger ken troll ti akin-aramid kadagitoy, a gapu ta awan ti makitada a pangdadael iti gobierno, agaramidda iti di um-umno a sarsarita ken fake news.
Iti maysa a press briefing, dinakamat ni Torre dagiti tallo a crime video a namanipular tapno padaksenda ti PNP.
Binabalaw ni Torre ti maysa a video nga impaskil ni Mitsy Vlogs a nangipakita iti tallo nga agkabannuag a nakalugan iti motorsiklo a nangikabil iti kayo a bangko iti tengnga ti kalsada a nakadesgrasiaan ti maysa a motorista.
Nadaras a pannakairuar ti ayuda kadagiti naapektaran ti didigra, imbilin ni Marcos
Segun ken ni Torre, pudno a napasamak ti insidente iti bideo, ngem saan nga iti Filipinas ti nakapasamakanna, no di ket iti Indonesia.
Dinakamat ni Torre ti maikadua a video, nga impaskil ni Kerwin Salvador dela Cruz, a mangipakpakita iti maysa nga agtutubo a nagaambonan dagiti grupo dagiti teenager. Ngem idi bineripikar ti Anti-Cybercrime Group ti PNP ti video, natakuatanda nga iti Vietnam ti nakapasamakan daytoy.
Ti maikatlo a video a dinakamat ni Torre, napasamak iti Cebu ken nagranget dagiti dua a pasahero ti bus, ngem saan a kaso ti panagholdap daytoy a kas ibagbaga ti vlogger a nangipaskil iti daytoy.
Indarum ti Police Regional Office 7 ti vlogger a nangipaskil iti nasao a video.
Kinuna ni Torre a dagitoy a vlogger ti mangallilaw ken mangpapati iti publiko a napasamak dagitoy iti Filipinas, nga iparparangarangda a kasla awanen ti talna ken urnos iti pagilian. (Aaron Recuenco/Manila Bulletin//Lito Hilidon/Bannawag)
