Imbilin ti Commission on Audit (COA) ti pannakaimbestigar dagiti flood control project iti Bulacan gapu iti mapapati nga anomalia ken dadduma pay nga irregularidad.
Impaulog ni COA Chairperson Gamaliel A. Cordoba ti pammilin babaen ti memorandum idi Agosto 12 kadagiti supervising auditor ti Department of Public Works and Highways (DPWH) iti COA Regional Office III.
Dinakamat ni Cordoba ti Sumbong sa Pangulo website, ket kinunana nga inyemplementar ti DPWH dagiti flood control project iti entero a pagilian nga agdagup iti ₱548 a bilion manipud iti Hulio 1, 2022 agingga iti Mayo 30, 2025.
Gapu kadagitoy a proyekto, ti Region 3 ti kaaduan ti flood control project nga addaan iti ₱98 a bilion (18 porsiento), idinto a ti probinsia ti Bulacan ti kaaduan iti flood control projects iti entero a Rehion 3, nga addaan iti ₱44 a bilion (45 porsiento).
Kaso nga impeachment kontra ken ni Marcos, winaswas ti Kamara
Maibatay iti imbutaktak ni Presidente Ferdinand R. Marcos, Jr. mainaig iti pannakaipatungpal dagitoy a proyekto, kangrunaan iti Bulacan, kinuna ni Cordoba a rumbeng unay a maaramid ti fraud audit.
Binilin ni Cordoba ti COA Regional Office III a mangidatag a dagus kadagiti amin a napateg a dokumento iti Fraud Audit Office.
Idi Agosto 11, inyusuat ni Marcos ti Sumbong sa Pangulo website a nairanta para iti pannakaimbestigar ken pannakatingiting dagiti flood-control project iti pagilian, a mabalin a pangipulongan dagiti umili.
Kinuna ti Malakanyang a manipud Agosto 11 agingga Agosto 13, addan naawatda a 1,148 a report ken 823 a feedback iti Sumbong sa Pangulo website. (Jeffrey Damicog/Manila Bulletin//Lito Hilidon/Bannawag)
