Binabalaw ni House Minority Leader 4Ps Party-list Rep. Marcelino "Nonoy" Libanan ita nga aldaw, Agosto 19, ti singasing a mangmandar iti presidente nga agdalan iti tinawen a drug test, ket kinunana a maysa a "panagpammarang" ken "gimik" laeng daytoy.
Ti gakat nga impila ni Senador Robinhood "Robin" Padilla ti dakdakamaten ni Libanan, a mangimandar iti presidente ken dadduma pay nga opisial ti gobierno iti tinawen a panagdalanda iti drug test.
Segun ken ni Libanan, imbes a dalusan ni Padilla ti bukodna a paraangan, yallatiw ti senador ti atension iti Office of the President.
Indatag ni Padilla ti singasing a linteg sumagmamano nga aldaw kalpasan a nairaman ti maysa nga empleadona iti kontrobersia a mainaig iti marihuana iti uneg ti Senado. Paset ni Padilla iti makunkuna a "Duterte bloc," a kritiko ti administrasion ni Marcos.
Mapukpukaw a nobia, nasarakan iti Pangasinan
Inlawlawag ni Libanan ti naisurat iti 1987 Constitution a nalawag a nangikeddeng iti kualipikasion iti saad a presidente, a nangipasigurado a dagiti laeng nasaririt, addaan nasin-aw a panagusig, ken moral a kababalin ti mabalin nga agakem.
Kinuna ni Libanan nga asino man ti agakem a presidente -- iti naglabas, agdama, ken iti masakbayan -- rumbeng a mailisi iti kastoy a kita ti di panangraem iti pagsaadan.
Innayon ni Libanan a dagiti demokratiko nga institusion, kas iti Kongreso, ket rumbeng a salimetmetanda ti dayaw ti kinapresidente uray asino man ti tumugaw iti dayta a pagtakeman, ta ti panangipababa iti dayta a dayaw ti mangpalupoy iti panagtalek ti publiko ken iti sistema nga insapatada a salakniban. (Ellson Quismorio/Manila Bulletin//Lito Hilidon/Bannawag)
