Impeksa ni Department of Public Works and Highways (DPWH) Secretary Manuel Bonoan idi Martes, Agosto 19, a mamati a mabalin a “ghost projects” (awan wenno bogus a proyekto) ti dadduma a proyekto a pangkontrol iti layus iti Bulacan.
Bayat ti Senate Blue Ribbon Committee hearing, nagsaludsod ni Senate President Pro Tempore Jinggoy Estrada ken ni Bonoan no adda kadi "ghost projects" iti Bulacan. kas naipadamag kenkuana. “In all honesty, your honor, I think so,” kinuna ni Bonoan.
Sinaludsod pay ni Estrada ti maipapan kadagiti report a dagiti proyekto kadagiti ilit ti Calumpit, Malolos, ken Hagonoy, Bulacan ket "ghost projects" a maipagarup a naited iti kontraktor a Wawao Builders ken SYMS Construction. A sinungbatan ni Bonoan: “Wen, agpayso dayta."
Mairaman ti Wawao Builders kadagiti 15 a kontraktor nga innaganan ni Presidente Marcos Jr. a nakaawat iti kaaduan kadagiti proyekto ti gobierno a pangkontrol iti layus kadagiti napalpalabas a tawen.
Mapukpukaw a nobia, nasarakan iti Pangasinan
Impalgak ni Bonoan a nakaala ti Wawao Builders kadagiti proyekto nga aggatad iti ₱9 a bilion iti entero a pagilian, a pakairamanan ti ₱5.97 a bilion para kadagiti 85 a proyekto iti laeng Bulacan, nga amin ket adda iti babaen ti First Engineering District Office ti DPWH. Kadagitoy a 85 a proyekto, kinuna ni Bonoan a mabalin nga adda dagiti sumagmamano a 'ghost projects."
Iti datos nga inted ti Estrada, mapapati a nakaileppas ti SYMS Construction iti 16 a proyekto nga agdagup iti ₱931.2 a milion iti napalabas a tallo a tawen.
Iti pannakasukimat kadagiti rekord ti DPWH, naipakita a ti Wawao Builders ket kukua ni Mark Allan Arevalo, idinto a ti SYMS Construction ket maysa a sole proprietorship a kukua ti maysa nga agnagan iti Sally Nicolas Santos.
Kinuestionar ni Estrada no ti sibubukel a ₱5.97 a bilion iti Bulacan ket mangibagi kadagiti "ghost project" ket kiniddawna nga iruar ti DPWH ti naan-anay a pannakabingaybingay dagiti proyekto a naited iti kontraktor.
Kinuna ti hepe ti DPWH nga agtultuloy ti validation, a manamnama ti financial ken physical reports iti uneg ti makalawas. Innayonna a dagiti mapapati a "ghost project," kaaduanna a sakupen dagiti kontrata a naipatungpal idi 2021 agingga 2022.
Kinuna ni Sen. Rodante Marcoleta, a nangidaulo iti hearing, nga i-subpoena ti komite ti akinkukua iti Wawao Builders kalpasan a saan a simmungbat ti kompania kadagiti imbitasion.
Kinuestionar met ni Marcoleta ti Commission on Audit (COA) no kasano a dida nadnadlaw dagiti mapapati a "ghost project."
"Ammoyo kadi no ania ti problemayo, Madam COA? Post-audit laeng ti ar-aramidenyo. Sa la isayangkatyo ti audit no malpasen ti proyekto," kinuna ni Marcoleta.
Manipud iti 15 a kompania ti konstruksion a naimbitaran iti hearing, pito laeng ti nagparang nga akinkukua wenno pannakabagi ti kompania.
Para kadagiti sumarsaruno a hearing, mapatulodan dagiti sumaganad iti subpoena:
Cezarah C. Discaya, presidente ti Alpha and Omega Gen. Contractor & Development Corporation;
Ma. Roma Angeling D. Rimando, owner/manager ti St. Timothy Construction Corporation;
Eumir Villanueva, presidente ti Topnotch Catalyst Builders Inc.;
Aderma Angelie Alcazar, presidente/CEO ti Sunwest, Inc.;
Edgar Acosta, presidente ti Hi-Tone Construction & Development Corp.;
Romeo Miranda, presidente/AMO ti Royal Crown Monarch Construction & Supplies Corp.;
Mark Allan Arevalo, general manager ti Wawao Builders; ken
Luisito Tiqui, presidente ti L.R. Tiqui Builders, Inc. (Dhel Nazario/MANILA BULLETIN)
