Kayat ni Presidente Ferdinand Marcos Jr. a mairingpas ti pannakaimbestigar dagiti anomalia iti flood control project ken maidarum dagiti nairaman iti daytoy, sakbay nga agleppas ti terminona, impakdaar ti Malakanyang ita nga aldaw, Agosto 20.
Segun ken ni Presidential Communications Office (PCO) Undersecretary Claire Castro, nakarurod ni Marcos idi nakitana ti maysa a riverwall project iti Bulacan a nailanad a "completed" iti report ngem saan pay met a narugian a naipatakder. Maibatay iti opisial a dokumento, agbalor iti ₱55 a milion ti proyekto nga agatiddog iti 220 a metro.
Impasingked ni Castro a kayat ni Marcos ng adda madusa gapu kadagiti makunkuna a "ghost project" wenno substandard a flood control project iti pagilian.
Kinuna ni Castro a binilin ni Marcos dagiti ahensia a darasenda ti agimbestigar, ngem inyunay-unayna a masapul a detaliado ken kompleto ti ebidensia dagiti resulta ti imbestigasion.
Senado, pinasingkedanna ti ₱6.793-trilion a nailian a badiet para 2026
Kinuna ti Malakanyang itay kallabes a reprepasuen ti maysa legal team dagiti flood control project ti DPWH iti entero a pagilian apaman a natakuatanda a substandard wenno pulos nga awan ti naipatakder a flood control project.
Sinarungkaran ni Marcos ti maysa a flood control project iti Baliuag, Bulacan ita nga aldaw (Agosto 20), ket imballaagna a mabalin a maidarum iti kaso nga economic sabotage dagiti akin-aramid kadagitoy. (Argyll Cyrus Geducos/Manila Bulletin//Lito Hilidon/Bannawag)
