Naikkat iti puestona ni Philippine National Police (PNP) Chief Gen. Nicolas Torre III, segun iti waragawag ni Executive Secretary Lucas Bersamin ita a Martes, Agosto 26.
Iti suratna a napetsaan iti Agosto 25, binilin ni Bersamin ni Torre nga agikkat iti puestona ken siguraduenna ti umisu a pannakayawat ti puesto iti sumukat.
“Para iti agtultuloy ken nasigo a pannakaipaay ti serbisio publiko iti PNP, maibilin kenka ti pannakasigurado a pannakayawat ti amin a bambanag, dokumento ken impormasion a mainaig iti opisinam,” kinuna ti surat a pirmado ni Bersamin.
Iti pannakasursurat daytoy a damag, awan pay nakuna ti Malacañang a nayon a detalye maipapan iti pannaikkat ni Torre.
Pannakaimbestigar ti mining permit iti Dupax del Norte, kiniddaw ni Sen. Pangilinan
Kabayatanna, naulimek pay laeng, iti agdama, ti PNP iti nasao nga isyu.
Ikagkagumaan dagiti kameng ti media iti Camp Crame a maala ti biang ni Torre ken ni PNP spokesperson Brig. Gen. Jean Fajardo, ngem saanda pay a simmungbat.
Nadutokan ni Torre idi Hunio a kas maika-31 a hepe ti PNP ken maikapat a daulo ti PNP iti administrasion ni Marcos.
Isu ti umuna a hepe ti PNP manipud iti PNP Academy ken naikeddeng nga agretiro koma inton Marso 11, 2027. (Darryl John Esguerra/Lloyd Caliwan/PNA)
