Naipila iti maika-20 a Kongreso ti gakat a linteg a mangmulta iti ₱2 a milion ken mangibalud iti 12 a tawen kadagiti mapaneknekan a nagiwaras wenno nangipablaak iti "fake news."
Indatag daytoy da Cagayan de Oro City 2nd district Rep. Rufus Rodriguez ken ABAMIN Party-list Rep. Maximo Rodriguez Jr. babaen ti House Bill (HB) No.3799, wenno ti "Anti-Fake News and Disinformation Act."
Inlawlawag dagiti nangipila iti gakat a nupay garantiaan ti Konstitusion ti wayawaya iti panagsao (freedom of speech), saan nga absoluto daytoy a kalintegan, nangruna no ti panagsao ket mangikulbo iti publiko wenno iti nailian a talged.
Inlawlawag ti HB No.3799 ti kaipapanan ti "fake news" a kas "inuulbod wenno makaallilaw nga impormasion a naiparang a kas pudno wenno damag (news), a nairanta a naiwaras tapno mangdadael ken mangallilaw iti publiko, a mangpataud iti pannakariro, gura, wenno kinaranggas, wenno mangsinga iti urnos ti publiko."
Kaso nga impeachment kontra ken ni Marcos, winaswas ti Kamara
Ti met "disinformation," segun iti HB No.3799, ket impormasion a nairanta a naiwaras tapno mangmanipular ken mangimpluensia iti kapanunotan ti publiko, kababalin, wenno annuroten.
Mairaman iti HB No.3799 dagiti "fake news" a makadadael iti nailian a seguridad ken diplomatiko a relasion, mangbiang iti eleksion wenno iti panagresponde iti didigra, wenno gapuanan dagiti opisial ti gobierno, journalist, wenno influencers nga addaan nasurok 50,000 a followers a mangab-abuso kadagiti social media platform-da.
Isingasing ti HB No.3799 a maipupok manipud 6 agingga iti 12 a tawen ken mamulta manipud ₱500,000 agingga ₱2 a milion ti asino man a mapaneknekan a nangiwaras iti "fake news."
Tapno maliklikan ti pannakaabuso daytoy a gakat, mailaksid dagiti satiriko (satire), parody, editorial content, personal nga opinion, di inggagara a panagbiddut iti panagipadamag a buyogen ti napatalgedan a nagtaudan ti impormasion. (Ellson Quismorio/Manila Bulletin//Lito Hilidon/Bannawag)
