Gapu iti panagraira ti panangallilaw a pinataud ti artificial intelligence (AI), indatag ni Parañaque City 2nd district Rep. Brian Raymund Yamsuan ti linteg a mangipasdek iti pagannurotan iti panagusar kadagiti makunkuna a "deepfake."
Dinagadag ni Yamsuan dagiti padana a kongresista nga anamonganda koma ti gakatna a House Bill (HB) No.3214 wenno gakat a "Deepfake Regulation Act," a mangsalaknib kadagiti Filipino manipud kadagiti "deepfake" a pinataud ti AI a mabain nga usaren a pangallilaw iti publiko, mangdadael iti dayaw, agpammarang a kas maysa tao, ken mangiladawan pay kadagiti tattao iti non-consensual a sexual content.
Segun iti Cybercrime Investigation and Coordinating Center (CICC), agdagup iti 10,004 a kaso ti cybercrime ti naipila iti opisinada idi 2024, mamitlo ti kaaduna idi 2023 a 3,317 laeng.
Inyebkas ni Yamsuan ti pannakaseknanna kadagiti "deepfake" a mausar tapno mamanipular ti politikal a diskurso, ken iti sabali a kaso, mabalin a mangpataud iti guranggura ken kinaranggas.
Maibatay iti HB No.3214. maaddaan ti tunggal Filipino iti nainkasigudan a kalintegan a mangtagikua iti langada, agraman ti rupa, bagi, ken timek, a saanen a masapul a mairehistro daytoy para iti trademark wenno copyright protection.
Balido latta ti warrant of arrest ni Dela Rosa --Malakanyang
Segun ken ni Yamsuan, vice chairperson ti House Committee on Public Information, nakadadanag dagiti kaso ti panagabuso ti AI, ket masapul ti natibker a paglintegan a maibusor kadagiti "deepfake" a panggepda nga allilawen dagiti umili, mangperdi iti dayaw, wenno mangiwaras iti "fake news."
"No saantayo nga agtignay ita, mabalin a mausar daytoy a teknolohia a mangpataud iti kinaranggas," kinuna ni Yamsuan.
Segun iti panangilawlawag ti HB No.3214, ti "deepfake" ket ti ania man a kita ti media kas iti ladawan, bideo, wenno audio file a naaramid babaen ti artificial intelligence a mangtulad iti rupa, bagi, ken timek ti maysa a tao, a kasla agpaypayso.
Iti kallabes, nagraira dagiti "deepfake" iti internet a nangusar iti langa dagiti artista, nalatak a negosiante, journalist, agraman ti maysa a senador, a nangallilaw kadagiti tao tapno agpuonan dagiti biktimada iti palso nga investment.
Nupay adda ti paglintegan iti data privacy ken anti-discrimination, awan kadagitoy ti mangiwanwan iti panagaramat iti AI, isu nga agtultuloy ti panagraira dagiti scam.
Salakniban ti HB No.3214 ti asino man a tao a nausar ti langana, nga awan pammalubosna, iti "deepfake" babaen ti pannakaipaay iti kalinteganna a mangkiddaw iti pannakaikkat ti unauthorized content iti platform a nakaipaskilan ti "deepfake," ken masapul nga umannurot ti maseknan a social media platform iti las-ud ti 48 nga oras manipud pannakaawatda iti napatalgedan a reklamo.
Insingasing ti HB No.3214 a madusa dagiti tao wenno social media platform a manglabsing iti linteg iti pannakaibalud iti dua agingga iti lima a tawen ken agmulta iti manipud ₱50,000 agingga iti ₱200,000.
Dagiti met online platform a di mangipangag iti takedown requests iti uneg ti 48 nga oras, mamulta iti ₱50,000 iti inaldaw a di panagtungpal. (Ellson Quismorio/Manila Bulletin//Lito Hilidon/Bannawag)
