MAYSA kadagiti kurso a pagaayat ita nga alaen dagiti agtutubo ket ti kinamarino wenno Seaman Course. Siguro, nagbalin nga inspirasionda dagiti immun-una a seafarers a kalugaranda, kameng ti pamiliada, kakabagian, wenno gagayyemda. Nalabit nakitada ti dakkel a nagbaliwan ti kasasaad ti biag dagitoy.
Ania Kadi ti Seaman?
Ti seaman wenno seafarer ket maysa a mangmangged iti taaw babaen ti barko a nakaikappenganna. Agtrabaho daytoy iti departamento a yanna iti barko kabayatan nga aglaylayag daytoy iti taaw a mapan iti nadumaduma a nasion. Ania man ti klasena a barko ti yanna, makuna daytoy a seaman. Uray dagiti adda iti cruise ship ken babassit a barko a kas iti fishing vessel, tugboat, kdp., makuna met a seaman dagitoy.
Adda dagiti opisial ken departamento iti uneg ti barko no ti nasao a barko ket tanker ship, car ship, container ship, reefer ship, bulk carrier, log carrier, ken livestock carrier.
Saan a Basta Mani ti Imulam, Pari
Umuna a departamento ket ti Deck Department. Ditoy a nakalinia ti Kapitan a kas kangatuan iti takem wenno posision iti barko. Isu ti paggapuan ti amin a mandar; napusgan nga akinkargo iti barko kabayatan ti panaglaylayag daytoy iti taaw. Isu ti representante wenno pannakabagi ti akinkukua iti barko (ship owner) iti nangupa iti barko (charterer) tapno maibiahe ti ania man a kargamento.
Maikadua ti Chief Mate. Isu ti sumaruno a kangatuan iti uneg ti barko. Mabalinna a sunuan ti kapitan kadagiti responsibilidad no adda dagiti saan a mapakpakadaan nga aberia iti uneg ti barko. No aglaylayag ti barko iti taaw, ti Chief Mate ti agmando iti bridge (yan ti manibela no lugan koma) manipud iti alas 4:00 iti parbangon agingga iti alas 8:00 iti bigat ken kasta met laeng nga oras iti malem agingga iti sardam.
Maikatlo, ti Second Mate. Isu ti napusgan a First Aid doctor iti barko no adda dagiti aksidente a mapasamak. Iggemna pay ti ship’s store a yan dagiti personal a kasapulan dagiti crew (tripulante), kangrunaanna ti PPE (Personal Protective Equipment). Isu met ti ag-duty iti bridge no aglaylayag ti barko manipud iti alas 12:00 iti aldaw agingga iti alas 4:00 iti malem ken iti kasta met laeng nga oras iti parbangon. Isu pay ti napusgan a mangidaulo karaman dagiti dadduma a crew iti bow deck bayat ti panag-atraka ken panagdis-atraka ti barko (isasanglad ken ipapanaw ti barko iti pantalan).
Maikapat ti Third Mate. Isu met ti ag-duty iti bridge manipud iti alas 8:00 iti bigat agingga iti alas 12 iti aldaw ken iti kasta met laeng nga oras iti sardam babaen ti panangtarabay kenkuana ti Kapitan. Naka-assign met isuna iti poop deck (pagwanawanan) para iti panag-atraka ken panagdis-atraka ti barko.
Sumaruno ti Bosun wenno maestro amo; isu ti napusgan a mangidaulo iti amin a trabaho iti deck babaen dagiti crew nga adda iti babaenna. Umuna ti A/B wenno Able Body Seaman; OS wenno Ordinary Seaman, ken Deck Cadet.
Engine Department
Umuna, ti Chief Engineer. Isu ti napusgan a paggapuan ti amin a bilin maipapan iti amin a trabaho iti engine room. Adda iti babaenna ti Second Engineer ken Third Engineer. Isuda ti mangkita ti naannayas a panagandar ti makina kabayatan ti panaglaylayag ti barko iti taaw. Dagiti dadduma pay a crew nga adda iti babaenda: Fitter, Oiler, Wiper, ken Engine Cadet.
Galley Department
Masapul met a mangan dagiti agtrabaho iti uneg ti barko isu nga adda daytoy departamento ti kosina. Amin a klase ti barko a naagapad iti ngato, addaan iti maysa a Chief Cook. Isu ti napusgan nga agluto ti kanen dagiti crew. Katulonganna ti Messman ken Messboy manipud iti maidasar iti bigat, aldaw, ken rabii.
Dagiti Kualipikasion
Dagiti agyan iti Deck Department, masapul a nakalpas ti tallo a tawen a kurso nga AMT wenno Associate in Marine Transportation. Tallo a tawen laeng ti kaadda iti pagadalan ta iti maikapat a tawen, masapul a sumakay iti barko a kas OJT wenno On The Job Training tapno makompleto a 4-year course. (Sumakay ti termino a maar-aramat nupay saan met a nuang wenno baka ti barko.) Inton malpas ti OJT, agsubli iti pagadalan tapno alaenna ti diplomana iti BSMT (Bachelor of Science in Marine Transportation) a pakakitaan a nalpasna ti uppat a tawen iti kolehio.
Kasta met laeng iti Engine Department, tallo a tawen ti panagbasa tapno makaala iti Associate in Marine Engineering a titulo. Kalpasan ti maysa a tawen nga OJT, agsubli met iti nagbasaanna tapno mangala iti diploma iti Bachelor of Sciènce in Marine Engineering). Iti dayta a gundaway, kas iti BSMT, mabalinnan ti mangala ti exam nga iwayat ti Professional Regulation Commission (PRC).
Iti Galley Department, masansan nga aggapu iti kina-Messman dagiti agbalin a Chief Cook. Mabalin met dagiti naggapu kadagiti dadakkel a restauran, five-star hotel wenno dagiti adda ammona iti panagluto iti international dish a maadal kadagiti culinary schools ta ngamin, gagangay a nadumaduma a puli dagiti agtrabaho iti barko.
Ti maysa pay a pagpilian a kurso ket ti STC wenno Seaman Training Course. Maysa a tawen laeng daytoy. No makasakay iti barko, agingga laeng iti Bosun wenno maestro amo ti kangatuan a magtengna no may-assign daytoy iti Deck Department. Agingga laeng met iti Fitter no may-assign iti Engine Department.
Saan laeng a dagiti nagbasa iti Seaman Course ti mabalin nga ag-seaman. Iti cruise ship, mabalin met a kunaen a seaman dagiti nurse, doktor, waiter/waitress, roomboy, cleaner a naggapu kadagiti five-star hotel ken dagiti service crew kadagiti nalatak a fast food chain. Mabalin pay dagiti bartender ken dagiti adda background-na iti culinary courses. Mabalin met a sumakay iti barko dagitay nakalpas iti engineering (ania man a klase ti engineering) aglalo no addaanen ti lisensia manipud iti PRC.
Pagbasaan ti Seaman Course
Umuna ken kalatakan a pagbasaan ita iti kina-seaman ti PMMA wenno Philippine Merchant Marine Academy iti Zambales. Akademia daytoy ti gobierno ket agawatda kadagiti lallaki ken babbai. Addaan daytoy iti entrance examination a pakasuotan ti mental ken physical capability ti maysa a kadete. Apaman a maipasa ti exam, mangrugi metten ti training. Adu dagiti ag-quit kabayatan ti panagsanay ta saanda a kabaelan ngem adu met dagiti makaturpos. Pagsayaatanna no nakaturpos ti estudiante iti akademia, agbalin nga opisial a dagus no sumakay iti barko (kas Third Mate).
Gapu iti kinalatak ti Seaman Course, adu itan dagiti kolehio a mangididiaya iti daytoy a kurso uray pay kadagiti probinsia.
Kasano ti Sumakay iti Barko?
Sakbay a sumakay iti barko, masapul nga addaan iti Seaman's Book, TOR (Transcript of Records) manipud iti nagbasaan, Diploma, SOLAS (Safety Of Life At Sea) certificate, medical results a pakakitaan a saan a color blind, ken dadduma pay a safety training certificates.
Agaplay met kadagiti manning agencies nga addaan ti valid recruitement license nga akreditado ti POEA. Saan a gamden ti agaplay kadagiti ahensia nga agawat iti pasuksok wenno “lagay” ta dakkel ti posibilidadna a peke dagitoy. Napimpintas pay no ag-utility nga umuna iti opisina ti manning agency no la ketdi adda gundaway. Seniority basis ngamin dagiti utility cadet ket inton madanon met ti batang, isunto metten ti isasakay iti barko. Adda met dita ti AMUSOP a napinget a tumultulong kadagiti agdadamo a seafarers.
Dagiti Agur uray a Benepisio
Iti bukodmi a padas, dakdakkel nga amang ti sueldo ti Seaman no idilig iti sueldo dagiti agab-abroad iti Middle East. Kabayatan ngamin nga agbaybayag iti barko, maikonkonsiderar ti seniority pay. Ngumato metten ti sueldo no agbalinen nga opisial. Maysa pay, adda gundaway a malikmut ti lubong wenno makapan iti nadumaduma a nasion nga awan gastos. Kangrunaanna, agbalin a natalged ti pinansial a kasasaad ket magatang dagiti kasapulan, ken matulongan dagiti nagannak ken dadduma pay a kakabsat ken kakabagian. –O
(Maysa nga OFW, tubo ti Naglicuan, Pasuquin, I. Norte ni S.A. Vila; agnaed ti pamiliana iti Bagumbong, Caloocan City North.)
(Bannawag, Mayo 1-15, 2022)
