Nakemmeg dagiti autoridad ti lima a kameng ti Land Transportation Office (LTO) 02 Regional Law Enforcement iti naisayangkat nga entrapment operation kadakuada gapu iti mapapati a panagkikil, iti Brgy. Banggot, Bambang, Nueva Vizcaya, idi rabii ti Septiembre 1.
Nabigbig dagiti suspek a da alias Ben, 36, baro, residente ti Makati City; alias Josh, 29, addaan asawa, taga-Caloocan City; alias Manuel, 35, baro, residente ti Quezon City; alias Mab, 42, addaan asawa, taga-Tuguegarao City; ken alias Fer, 39, addaan asawa, taga-La Union ken mapapati a team leader ti grupo.
Segun iti Police Regional Office 2 (PRO-2), naipakat ti operasion kalpasan a makaawat ti Nueva Vizcaya Police Provincial Office (NVVPO) iti reklamo (affidavit complaint) manipud iti lima a tattao a dawdawatan ida ti grupo iti ₱200,000 tapno mai-release ti maysa a naka-impound a van ket ₱25,000 ti umuna a pagbayadda a pangareglo (settlement).
Malaksid itoy, segun kadagiti nagreklamo, kinuna ni chief ti PNP Bambang Police Major Randy Valente nga adda pay binulan a maited kadagiti suspek a ₱1,000 kada unit ken ₱2,000 kada van nga addaan green plate tapno agpaay a kas proteksion wenno tapno saanda ida a tiliwen. Bayad kano daytoy dagiti lugan nga awanan prangkisa tapno mapalubosanda no sadaen ida dagiti autoridad.
Farm specialist iti Abra, napaltogan
Nagtipon dagiti puersa ti Bambang Police Station, Nueva Vizcaya Provincial Intelligence Unit, ken ti DOTr-CAR tapno iwayatda ti entrapment operation, a nagresulta iti pannakakemmeg dagiti nasao a kameng ti LTO.
Nakompiskar kadagiti suspek dagiti sumaganad nga ebidensia: 1 a cal. .45 pistol nga addaan 7 a bala; 1 a Glock 19 (9mm) nga addaan 3 a magasin ti bala ken 31 a bala; 1 a .45 Armscor a pistola nga addaan 5 a bala; 1 LTO badge ken inside holster; citation tickets; driver’s license ken photocopy ti official receipt; 1 nga sling bag a naglaon kadagiti ID, resibo, ken petaka; 7 a touchscreen cellphone; nadumaduma nga identification cards; cash nga aggatad iti ₱96,500; marked money ken boodle money; 1 a plastic sachet ti maatap a shabu a mapattapatta a 0.69 a gramo; ken 2 nga improvised pipe tubes ken 2 a disposable lighter.
Maidarum dagiti lima a suspek iti agtutuon a kaso a pakairamanan ti panaglabsing iti Republic Act 3019 wenno Anti-Graft and Corrupt Practices Act; Republic Act 6713 wenno Code of Conduct and Ethical Standards for Public Officials and Employees; ken Republic Act 9165 wenno Comprehensive Dangerous Drugs Act of 2002. (Rachel Magday/DWRV)
