Nagkaykaysa a linaksid dagiti opisial ti Oyao. maysa a barangay iti Dupax del Norte, Nueva Vizcaya, ti kiddaw ti Woggle Corporation, maysa a kompania ti panagminas, a pannakasertipikar ti konsultasion iti komunidad ket indeklararda ti natibker a panangbusorda iti ania man nga aktibidad ti panagminas iti lugarda, bayat nga umad-adda ti panangkontra ti adu nga umili.
Iti maysa a surat idi Agosto 25 a naiturong ken ni Lorne Harvey, general manager for operations ti Woggle Corporation, saan a pinatgan ti Barangay Council of Oyao ti kiddaw ti kompania a pannakaipaulog ti Certificate of Consultation.
Pinirmaan ti kapitan ti barangay a ni Junior Taligan, nailanad iti dokumento a ti inaramid ti kompania idi Agosto 15 iti barangayda ket “saan a Public Consultation, no di ket maysa laeng nga Information and Education Campaign.”
“Ti balido a Konsultasion iti Publiko, kas nalawag a makalikaguman iti babaen ti linteg, kasapulan ti kaadda ken aktibo a pannakipaset dagiti Opisiales ti Barangay, kamkameng ti komunidad, dagiti pannakabagi manipud iti Mines and Geosciences Bureau ken Department of Environment and Natural Resources, ken amin a maseknan, a sadiay ket siwawayawaya a mangngegan ken madukomentaran dagiti timek, pakaseknan, ken ibubusor dagiti umili. Awan ti natungpal kadagitoy a kasapulan,” kuna pay ti surat.
Marcos, Robredo, nagsarak iti Naga city
Innayon ni Taligan: “No kayat ti Woggle Corporation nga ituloy ti kiddawna, masapul nga umuna a tungpalenyo ti linteg babaen ti panangisayangkatyo iti pudpudno, nalawag, ken inklusibo a Konsultasion iti Publiko, nga addaan iti naan-anay a pannakairaman ti komunidadmi ken ti panangimaton ti MGB Region II.”
Sungbat daytoy iti surat ni Harvey idi Agosto 21, a nagkiddaw iti sertipiko, a maysa kadagiti dokumentario a kasapulan para iti exploration permit. Ibilbilin ti Section 23 ti Revised Implementing Rules and Regulations ti Philippine Mining Act of 1995 a dagiti kompania ti panagminas ket mangisubmitir iti pammaneknek ti konsultasion kadagiti mainaig a konseho a mangiturturay sakbay a rugianda ti Exploration Work Program-da.
Naipaulog idi Agosto 4 babaen ti Mines and Geosciences Bureau, sakupen ti exploration permit ti Woggle ti nasurok a 3,100 nga ektaria a masakupan ti lima a barangay ti Dupax del Norte: Bitnong, Inaban, Munguia, Parai, ken Oyao.
Nangiruar pay dagiti opisial ti barangay iti nakasina nga statement, nga inawaganda ti naaprobaran nga exploration permit ti Woggle kas “sensitibo, mamagsisina, ken makadadael.” Impasiguradoda kadagiti bumarangayda nga agmaymaysa ken sititibker a kontraenda ti ania man nga aktibidad ti panagminas iti barangayda.
“Saan a tuleng wenno bulsek dagiti barangay official-yo, ken saankami a nabayadan tapno agulimek iti maysa a banag a mamagpeggad iti masakbayan dagiti agtutubo a kaputotantayo, ti pagbiagantayo, ti pagtaudan ti danumtayo, ken ti di maibabawi a pannakadadael ti aglawlawtayo,” kuna pay ti statement.
Immun-unan nga inrugi dagiti residente ti maysa a signature campaign a “pangdepensa kadagiti pagtaengan, tawid, ken pagbiagan... [ken ti] kritikal nga aglawlaw a mangsussustiner iti barangay ken iti rehion,” a mangdagdagadag iti MGB a mangilaksid kadagiti dagdagada a minasen ti Woggle.
Sinangaili pay ti Oyao ti mining forum idi Agosto 23, a tinabunuan dagiti umili ken mangitantandudo iti pannakasalaknib iti aglawlaw, a pakairamanan ni dati a gobernador Ruth Padilla.
Nangangay met ti Committee on Environment ti konseho munisipal ti Dupax del Norte iti hearing idi Agosto 20 maipapan iti exploration project, a nangyebkasan dagiti lokal nga opisial iti "pannakasorpresad iti pannakaipaulog ti exploration permit." Indatagda pay dagiti pakaseknan maipapan iti nakaro a pannakadadael ti aglawlaw, mapapati nga iregularidad iti pannaproseso ti permit, ken saan nga umdas a pannakilangen kadagiti naapektaran a komunidad.
Iti laksid met ti ibubusor ti komunidad ken dagiti pakaseknan a nadakamat bayat ti town-level hearing, nagbotos ti provincial board ti Nueva Vizcaya a maikkan ti Woggle iti Certificate of Consultation, a maysa laeng a provincial board member ti nagkontra, kalpasan nga impakaammo ti Woogle kadagiti board member dagiti aktibidadda iti exploration. (Sherwin De Vera, Northern Dispatch/ Danilova Molintas)
