Imbestigaren ti Mines and Geosciences Bureau (MGB) Regional Office 02 ti mapapati a panaglabsing ti Woggle Corporation, maysa a kompania ti panagminas, iti isaysayangkat daytoy nga exploration activities iti ili ti Dupax del Norte, Nueva Vizcaya.
Naituding ti panagimbestigar kalpasan a nakaawat ti MGB kadagiti reklamo manipud kadagiti lokal nga opisial ken umili maipapan iti operasion ti kompania, a nangtignay met ken ni MGB Director Mario A. Ancheta a mangibilin iti imbestigasion, kas sungbatna iti surat ni Nueva Vizcaya Rep. Timothy Joseph E. Cayton idi Agosto 29.
Kiniddaw ni Cayton ti panagimbestigar kalpasan a nakaawat daytoy kadagiti report maipapan kadagiti mapapati a panaglabsing mainaig iti exploration project ti Woggle.
Dagiti reklamo kangrunaanna a maipapan kadagiti aktibidad ti Woggle, a nai-report a pakairamanan ti panagbukual kadagiti kayo ken panagserrek iti pribado a dagdaga. Dagitoy nga aramid ti nangpataud iti pakaseknan iti aglawlaw (environment) ken legal kadagiti umili ken lokal nga opisial iti Dupax del Norte.
Farm specialist iti Abra, napaltogan
Idi Agosto 20 ken 26, nangipatulod ni Cayton, dati a mayor ti Dupax del Norte, kadagiti surat iti MGB a mangidagdagadag iti ahensia nga imbestigarenda dagiti mairekreklamo nga aramid ti Woogle. Nangruna a nadakamat kadagiti reklamo ti kinakurang ti umisu a konsultasion iti komunidad sakbay a nangrugi ti exploration, a legal a kasapulan iti babaen ti exploration permit.
Indatag met ti Barangay Council of Oyao, dagiti isyu kas iti mapapati nga invalid public consultation idi Agosto 15 nga inangay ti Woggle, a segun iti barangay council ket maysa laeng nga “information and education campaign.” Ti Oyao ket maysa a komunidad dagiti mannalon ken maysa kadagiti lima a barangay a masakupan ti 3,100 nga ektaria a pangiwayatan ti Woogle iti exploration wenno panangsukisok iti urat dagiti mineral a mabalin a maminas.
Daytoy a kinakurang ti pormal a konsultasion ti nangrubrob iti kumarkaro nga ibubusor dagiti umili iti proyekto.
Idi Agosto 25, saan a pinatgan ti Oyao Barangay Council ti kiddaw ni Woggle a certificate of consultation, a kasapulan para iti exploration activities ti permit. Impeksa pay ti barangay council ti pannakaseknanda iti mabalin nga epekto ti nasao a proyekto iti aglawlaw ken iti pagbiagan dagiti lumugar.
Indagadag ni Rep. Cayton iti MGB a kompirmarenda no nagtungpal ti Woggle kadagiti kondision ti exploration permit-na, partikular ti maipapan kadagiti konsultasion iti publiko. Kiniddawna pay ti pannakasuspenso ti exploration no makompirmar ti ania man a panaglabsing iti permit wenno iti environmental laws.
Immanamong ti MGB Region 02 a mangimbestigar ti situasion ken mangted iti opisina ni Cayton kadagiti natakuatanda..Nupay kasta, saan pay a nangted ti ahensia ti timeline no kaano a malpas ti imbestigasion.
Depende iti pagbanaganna, mabalin nga agtungpal ti imbestigasion iti administratibo wenno lehislatibo a panagtignay, segun ken ni Cayton.
Addan iti Nueva Vizcaya dagiti dadakkel nga operasion ti panagminas, a pakairamanan proyekto ti OceanaGold iti Didipio iti ili ti Kasibu ken ti pagminasan ti FCF Minerals iti Runruno, iti ili ti Solano. (Artemio A. Dumlao//Luzon Morning Sun)
