Panggep ni Solid North Party-list Rep. Ching Bernos a mabuangay ti maysa nga ahensia a mangitandudo iti kinangayed ti amianan a Luzon, a gapu nga impilana ti House Bill (HB) No. 3109 a mangbukel iti Northern Luzon Development Authority (NLDA).
Segun ken ni Bernos, ti singasingna nga NLDA ti agpaay kas napaut ken inter-regional nga ahensia a mangitunos iti panagdur-as iti Cordillera Administrative Region (CAR), Ilocos Region, ken Cagayan Valley ken mangpaganaygay iti potensial ti turismo iti lugar.
Kinuna ni Bernos a dagiti rehion iti Northern Luzon--a buklen ti CAR, Ilocos Region, ken Cagayan Valley--ket naparaburan iti natural a rekursos, nabaknang a kultura, ken human capital. Ngem iti laksid daytoy, agtultuloy a mapsapsaran ti lugar ti di panagpapada iti panagdur-as, limitado nga impraestruktura, ken nasinasina a panangituray.
Ti NLDA ti mangilasin ken mangitandudo kadagiti agbalin a heritage town, natural park, ecotourism area, cultural landscape, agraman dagiti baybay ken bambantay a mabalin a pagpasiaran, ken agpuonan iti impraestruktura a para iti turismo kas iti kalsada, terminal, pagdagusan, ken visitor center. Suporataranna pay dagiti community-based tourism group ken babassit a negosio, nangruna dagiti imatonan ti babbai, agtutubo, ken indigenous people (IP).
Tignay ti Kamara iti kaso nga impeachment kontra ken ni VP Sara, maammuan ita nga aldaw
Maaddaan ti NLDA iti 50 a tawen a mandato a mabalin a mapabaro, a makitinnulong kadagiti LGU, nailian nga ahensia, pribado a negosiante, ken civil society tapno mapapardas ti sosio-ekonomiko a panagdur-as. (Ellson Quismorio/Manila Bulletin//Lito Hilidon/Bannawag)
