Ipakpakita ni Carole Domicog, health buff ken advocate ti urban gardening, dagiti nateng iti hardinna ti pagtaenganna iti Barangay Quezon Hill, Baguio City. (PNA photo ni Liza T. Agoot)

Inlatang ti Department of Agriculture iti Cordillera Administrative Region (DA-CAR) ti ₱8 a million tapno mapadur-as dagiti urban gardening project iti Siudad ti Baguio kas paset ti pannakaiganetget iti pannakagun-od iti food sustainability.

"Iganetget daytoy ti DA tapno masigurado nga adda latta magun-od a natnateng kadagiti urban area iti ania man nga oras, a maysa met nga inisiatibo ti ahensia para iti food sustainability," kinuna ni Emy Lou Cunning ti National Urban and Peri-urban Agriculture Program ti DA-CAR.

Mairaman iti urban agriculture ti panagmula kadagiti nateng, herb, rekado, root crop, ken prutas, kasta met ti panagtaraken kadagiti babassit a dingo iti ikub ti aglawlaw ti siudad.

Kinuna ni Cunning nga adda lima a community garden ken lima a "Gulayan sa Paaralan" project iti Siudad ti Baguio a naituding a maileppas ita a tawen.

Lokal

Farm specialist iti Abra, napaltogan

Dagiti lima a hardin ti komunidad ket imatmatonan ti Barangay Loakan Proper, North Sanitary Camp Farmers Association, Ibay Urban Garden Association, Barangay Lopez Jaena, ken Barangay Sto. Tomas Central..

Dagiti met lima a pagadalan a nairaman iti nasao a proyekto ket ti Magsaysay Elementary School, Alfonso Tabora Elementary School, Crystal Cave Integrated School, Baguio City National high School, ken Holy Ghost Extension Elementary School.

Segun ken ni Cunning, mairaman iti maited kadagiti aggargarden dagiti suplay ti agrikultura, community garden technologies, ken teknikal a tulong.

Kinuna met ni Marcelina Tabelin, chief agriculturist iti City Veterinary and Agriculture Office (CVAO), a panggep ti nasao nga inisiatiba ti mangpapigsa iti school-based food production, mangitandudo iti sustainable urban gardening practices, ken mangpasayaat iti nutrition awareness kadagiti estudiante.

Segun met ken ni Atty. Jennilyn Dawayan, regional director ti DA-CAR, nangirugida iti sumagmamano a programa tapno maparegta ti panagpataud iti taraon iti amin a sektor iti komunidad. "No mausar uray dagiti babassit a masetera ken nailet nga espasio kadagiti pagtaengan a mangpataud iti uray bassit laeng a nateng a mabalin nga apiten dagiti pamilia no kasapulan, nayon daytoy a taraon a patauden ti pagilian," kinunana. (Liza AgootPNA)