Determinado ti probinsia ti Ilocos Norte a mangikkat kadagiti agbibitin ken “spaghetti wires” kadagiti kangrunaan a kalsadana para iti nalawlawag a tangatang ken nataltalged a komunidad.
Daytoy ti sagudayen ti inaprobaran dagiti kameng ti Sangguniang Panlalawigan (hunta probinsial) nga Anti-Spaghetti Wire Ordinance of 2025 iti pinal a pannakaibasana idi Septiembre 1.
Kinuna ni Ilocos Norte board member Johanson Chua, kangrunaan a proponente ti Provincial Ordinance 2025-07-005, a gagangayen iti entero a probinsia dagiti agsasanggala ken makasali a barut wenno kable kadagiti poste, a mabalin a mangpataud iti peggad kas iti uram, aksidente, ken pannakasinga ti serbisio, nangruna no adda emerhensia.
Panggep ti baro nga ordinansa a ma-regulate ti safety ken aesthetic standards para kadagiti overhead wires, agraman ti kasapulan a vertical clearance, pannakaikkat dagiti nabaybay-an a wire, ken pannakalapped ti panagsakup kadagiti pribado a sanikua.
Farm specialist iti Abra, napaltogan
Innayon ni Chua a paset met daytoy ti panagsagana para iti naiplano nga underground cabling system, a maikonsiderar iti Siudad ti Laoag para iti masanguanan nga implementasion.
Ti di panangtungpal iti ordinansa, agmulta iti agingga iti ₱5,000.
Ibilin ti ordinansa ti panagtungpal iti Republic Act 11361 wenno ti Anti-Obstruction of Power Lines Act a mangipasigurado iti nawaya a sub-transmission ken distribution systems nga awanan kadagiti napeggad a lapped kadagiti air space, iti daga, ken iti aglawlaw a luglugar. (Leilanie Adriano/PNA)
