Nadakamat ni Deputy Speaker La Union 1st Rep Paolo Ortega da Pasig City Mayor Vico Sotto ken Ilocos Norte 1st district Rep. Sandro Marcos a mabalin nga agnumar iti singasing a pannakaipababa iti kasapulan nga edad ti agakem a kas presidente, bise presidente, ken senador.
Idi Septiembre 3, impila ni Ortega ti Resolution of Both Houses (RBH) No. 2, a mangangay iti constitutional convention (con-con) tapno maipababa ti edad ti agbalin a presidente ken bise presidente manipud 40, agbalin a 35.
Maipababa met ti edad ti agbalin a senador manipud 35, agbalin a 30.
Nasaludsod ken ni Ortega no adda am-ammona a tao a nalatak a daulo nga adda iti kastoy nga edad, ket dinakamatna da Sotto (agtawen iti 36), ken Rep. Marcos (agtawen iti 31).
Mapukpukaw a nobia, nasarakan iti Pangasinan
Inton maangay ti panagbobotos inton Mayo 2028, agtawenton iti 38 ni Sotto (nayanak idi Hunio 17, 1989) ken 34-to metten ni Rep. Marcos (nayanak idi Marso 7, 1994).
Ngem inlawlawag ni Ortega a saanna a durdurogan ti asino man tapno agngayangay iti nangatngato a pagsaadan inton 2028, ta saanda a kitkitaen ti personalidad, no di ket ti pagimbagan ti institusion tapno maaddaan iti baro a rupa dagiti agserbi iti publiko. (Ellson Quismorio/Manila Bulletin//Lito Hilidon/Bannawag)
