Pinakdaaran ni Senador Raffy Tulfo ni Sekretario ti Department of Labor and Employment (DOLE) Bienvenido Laguesma a paitantanna ti badiet ti ahensia para iti 2026 no saanda a sayaaten ti trabahoda ken no saanda nga ikkaten dagiti field inspector-da a saan a nagtungpal iti annongenda.
Daytoy ti imballaag ni Tulfo iti naangay a Committee on Labor hearing ti Senado ita nga aldaw, Septiembre 4,a pagpapaayanna a kas vice chairperson.
Imbutaktak ni Tulfo ti natakuatanna kalpasan ti panagsukimatna, nga adu dagiti pabrika iti CAMANAVA (Caloocan, Malabon, Navotas and Valenzuela area) ken Metro Manila, ti saan a mangmangted iti umisu a sueldo kadagiti mangmangged, ta ₱280 laeng kada aldaw ti ipaspasueldoda.
Segun ken ni Tulfo, kinitana ti listaan dagiti kompania a rumbeng a mainspeksion, ngem saan met nga aginspeksion dagiti field inspector ti DOLE, idinto a dagiti dadduma a field inspector ket agtarus iti opisina ti HR para iti close-door meeting ngem saanda met a kasarita dagiti agtrabtrabaho sadiay.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Dinillaw ni Tulfo ti DOLE ta saanda a maipatpatungpal ti naipangato a sueldo.
Kiniddaw ni Tulfo ken ni Laguesma a mangted iti listaan dagiti field inspector iti DOLE CAMANAVA ken Metro Manila, agraman dagiti kompania a sinarungkaranda ken ti report no ar-aramidenda met laeng ti karbenganda.
Imballaag ni Tulfo nga itantanna ti badiet ti DOLE no awan ti maikkat a field inspector a nangbaybay-a iti trabahoda.
Nagkumit ni Laguesma a tamingenna dagiti parikut a dinakamat ni Tulfo. (Dhel Nazario/Manila Bulletin//Lito Hilidon/Bannawag)
