Nangisayangkat dagiti kameng ti grupo nga Anakbayan iti protesta iti Department of Public Works and Highways (DPWH) central office iti Manila, a kinondenarda ni Presidente Marcos Jr. ken dagiti kangrunaan nga opisial ti gobierno gapu iti mapapati a dakkel ken nasaknap a panagkunniber kadagiti proyekto a panangkontrol iti layus.
Segun iti Anakbayan, dagiti nabiit pay a waragawag ti presidente a mangibutaktak kadagiti iregularidad iti DPWH ket bin-ig laeng "panagpolitika a pammarang a nadisenio tapno maibaw-ing ti responsibilidad."
Intudo ti grupo a dagiti makueskuestionar a proyekto ket insingasing ti Malakanyang ken pinirmaan a mismo ni Marcos a nagbalin a linteg, a mamagbalin iti maipagarup a panagpungtotna a kas "agpadpada a kinaipokrito ken saan a matalek."
Inladawan ni Anakbayan National Chairperson Mhing Gomez ti sungbat ti administrasion kas pamiliar a panagbuya laeng, a dagiti isu met la a politiko ti mangpadpadas nga agakem a kas bannuar bayat nga aktual a salsalaknibanda dagiti bukodda nga kaaliado.
Senado, pinasingkedanna ti ₱6.793-trilion a nailian a badiet para 2026
Ti panangilibak ni Marcos iti responsibilidad, segun iti grupo, paneknekanna laeng a mabalin a nagpalia a nangbasa iti nasional a badiet wenno pinilina a di ikankano dagiti mapagduaduaan a probision daytoy.
Binabalaw pay ti grupo ti imbestigasion ti Senado iti nasao nga isyu, a kunada nga idauluan daytoy dagiti tattao a mismo a maak-akusaran iti panagkunniber, kas kada Senador Jinggoy Estrada, Ronald dela Rosa, Bong Go, ken Rodante Marcoleta.
Inkalintegan ti Anakbayan a dagitoy a panagimbestigar ket pagpabuya laeng tapno masalakniban dagiti nabileg, saan a tapno agserbi para iti hustisia.
Krinitikarda pay ti nabayagen a kultura ti impunity wenno saan a pannakadusa iti politika ti Filipinas, a kunada a dagiti napalabas nga administrasion, nagaramid kadagiti awan mamaayna a kari ti panagreporma, iti man nagan ti “nalinteg a panagturay,” “addaan landok nga ima a liderato" wenno "nailian a panagkaykaysa" idinto a dida met mapagsungbat ti asino man a kangrunaan a naglabsing.
Da Marcos ken Bise Presidente Sara Duterte, segun iti grupo, ket simbolo dagiti elite political dynasties nga agtultuloy a mabenbenepisiaran ken mangitultuloy iti sistematiko a panagkunniber.
Inladawan ti Anakbayan ti agdama a gobierno kas kadakkelan a sindikato ti pagilian, a mangtaktakaw iti pondo ti publiko ken mangsalaknib kadagiti nangato ti saadna nga opisial manipud iti pannakausig.
Kas sungbat, inawagan ti Anakbayan dagiti agtutubo nga agtignay. Indagadagda kadagiti estudiante ken agtutubo a mangorganisarda kadagiti mass mobilization kadagiti eskuela, komunidad, ken kalsada para iti pudpudno a panagbalbaliw. (Diann Calucin/MANILA BULLETIN)
