Ti panaglusulos, saan a mangiliklik iti pannakadusa.
Daytoy ti kinuna ni Deputy Speaker Zambales 1st district Rep. Jay Khonghun kalpasan ti panaglusulos ni Herbert Matienzo a kas Executive Director ti Philippine Contractors Accreditation Board (PCAB) idi Septiembre 3.
Segun ken ni Khonghun, ita nga aldaw, Septiembre 5, ituloy latta ti Kamara nga ipakat ti lifestyle check ken ni Matienzo, kas paset ti panangilungalong ti Kamara iti pannakadusa kadagiti nakaaramid iti mapapati a panagkunniber iti panagrehistro dagiti contractor.
Kinuna ni Khonghun a saan latta a malisian ni Matienzo ti pannakadusana no nakaaramid daytoy iti maikaniwas, idinto nga agtultuloy ti panagimbestigar ti Kamara iti panangilako iti rehistrasion iti PCAB.
Nadaras a pannakairuar ti ayuda kadagiti naapektaran ti didigra, imbilin ni Marcos
Kiniddaw ni Khonghun idi Septiembre 2 a maipasidong koma ni Matienzo iti lifestyle check iti panagimbestigar nga insayangkat ti Infrastructure Committee (infra comm) ti Kamara kadagiti naanomalia a flood control project.
Innayon ni Khonghun a karbengan ti Kamara a dalusan ti sistema tapno masalakniban dagiti pondo ti gobierno, ken ilungalongda ti pannakabalbaliw ti accreditation process tapno maisardeng ti naipakadawyanen a panagkunniber iti panangkontrata kadagiti poyekto. (Ellson Quismorio/Manila Bulletin//Lito Hilidon/Bannawag)
