Agtultuloy ti yaadu dagiti panangkontra nga umili iti maar-aramid a panagsukisok iti panagminas iti ili ti Dupax del Norte, Nueva Vizcaya gapu iti pannakikaykaysa dagiti kooperatiba iti panangkiddaw iti Department of Environment and Natural Resources (DENR) a mangwaswas iti permiso nga inted daytoy iti Woogle Corporation, gapu iti kinakurang ti konsultasion iti komunidad ken iti posible a pannakadadael ti aglawlaw.
Ti Mungia Multi-Purpose Farmers Cooperative (MMPC) ti kaudian a nangkarit iti exploration permit a mangsakup ti 3,101 nga ektaria ti llima a barangay ti Dupax del Norte. Kinuna ti kooperatiba nga addaan iti 650 a miembro nga awan ti naaramid nga umisu a konsultasion kadagiti umili kas kalikaguman ti linteg.
“Agpannuraykami kadagitoy a pagtaudan ti danum para iti inaldaw a kasapulanmi ken para iti agrikultura,” kinuna ti kooperatiba iti suratda a napetsaan iti Agosto 26. “Ti apagbiit a ganansia saanna a maikalintegan ti napaut a pannakadadael.”
Kinuna pay ti MMPC a ti proyekto a panagminas ket apektaranna ti 70-ektaria nga agro-tourism site nga idebdebelop ti kooperatiba babaen ti National Greening Program ti DENR. Namakdaar ti grupo a dagiti aktibidad ni Woogle Corpopration ket mabalin a mangdadael kadagiti kabakiran ken pagtaudan ti danum a napateg iti komunidad. Binabalawda ti inawaganda a “corporate greed” ken ti “agtultuloy a pananggundaway” kadagiti lokal a rekursos.
Nabotosan, baro nga opisial ti Ilocos Sur Provincial Capitol Press Corps
Sakbayna, nangisubmitir met ti Saint Joseph Parish Multi-Purpose Cooperative-Belance iti petision iti Mines and Geoscience Bureau (MGB) Regional Office agraman dagiti dadduma nga organisasion. Inyebkasda pay ti suportada iti Brgy. Oyao.
Saan a pinatgan dagiti opisial ti Brgy. Oyao ti kiddaw ti Woogle a certificate of consultation, maysa a kasapulan tapno maituloy ti panagsukisok, a dinakamatda dagiti peggad iti aglawlaw ken pagbiagan ti komunidad. Intudoda pay a ti nabiit pay a miting nga inangay ti Woogle ket “information drive” laeng ket saan a balido a konsultasion iti publiko.
Ti Keon, a maysa a sitio iti Brgy. Bitnong, ti kangrunaan a lugar ti pagsukisokan ti Woggle Corporation, maysa a kompania ti panagminas a 60% a kukua ti FCF Minerals Senior Staff Annuity Corporation ken 40% a kukua ti Metals Exploration Plc. Inikkan ti MGB ti Woogle iti exploration permit idi Agosto 4 para iti nasurok a 3,100 nga ektaria a mangsakup iti lima a barangay: Bitnong, Inaban, Mungia, Parai, ken Oyao.
Impeksa metten dagiti kameng ti Simbaan a Katolika ti ibubusorda iti nasao a proyekto. Ti Diocesan Social Action Commission ken Indigenous People’s Apostolate ti kaudian a narelihiosuan a grupo a nangsuportar kadagiti komunidad a bumusbusor iti panagminas iti Dupax del Norte.
"Itakdermi ti panangkontra kadagiti aramid iti panagminas a mamagpeggad a mangdadael kadagitoy a napateg a rekursos ken mangapektar iti pagimbagan ti biag dagiti tattao. Itandudomi ti responsable a panangaywan iti natural a tawidtayo, a siguraduen a masalakniban dagiti dagdagatayo para kadagiti masanguanan a kaputotan," impakdaar dagiti opisina ti simbaan idi Agosto 28.
Indatag met dagiti opisial ti Nueva Vizcaya, pakairamanan ni Rep. Timothy Joseph Cayton ken ti Provincial Board, ti pakaseknan iti MGB.
Indagadag ni Cayton iti MGB nga imbestigarenda ti isyu, a dinakamatna dagiti reklamo maipapan iti pannakasualit/pannakaparut dagiti kayo ken panangserrek iti pribado a lote iti pakaiwaywayatan ti exploration. Ingganetgetna pay ti pannakasuspenso dagiti aktibidad ni Woogle no mapasingkedan dagiti panaglabsing.
Nangipasa met ti Provincial Board iti resolusion a mangidagadag iti pannakasuspenso ti exploration agingga a matungpal ti Woogle dagiti kondision ti permit.
Impubliko ti konseho ti ili ti Dupax del Norte ti kiddawda a pannakakanselar ti permit. Inwaragawagda pay ti plano a mangipasdek iti 50-tawen a renewable moratorium kadagiti aktibidad ti panagminas ken panagsukisok. “Pilienmi ti panagrang-ay a mangsalaknib, agpaut a pagbiagan, ken ti panagdur-as a di mangdadael,” ingganetget ti konseho. (Artemio Dumlao/Dispatch ti Amianan/nordis.net)
