Impalgak da Cezarah “Sarah” Discaya ken Pacifico “Curlee” Discaya ita nga aldaw, Septiembre 8, dagiti nagan ti kongresman ken opisial ti Department of Public Works and Highways (DPWH) nga agdawdawat iti agingga iti 25 a porsiento a kickback kadagiti flood control project ti gobierno, a nagkuna a maitantan dagiti proyekto no saan ida a mabayadan.
Iti panangbista ti Senate Blue Ribbon Committee kadagiti naanomalia a flood control project, imbutaktakda a 10 a porsiento agingga iti 25 a porsiento ti gatad ti proyekto ti al-alaen kadakuada dagiti opisial. Innayon da Discaya a nabayadan dagitoy nga opisial ti gobierno iti cash ken nairekord kadagiti voucher ken iti ledger a mangipakpakita kadagiti gatad, petsa ken nagan dagiti immawat.
Segun iti testimonia a sinapataan dagiti Discaya, imbutaktakda dagiti nagan dagiti politiko ken opisial a maipagarup a nainaig iti naanomalia a proyekto nga isu da:
Terence Calatrava, dati nga undersecretary ti Office of the Presidential Assistant for the Visayas; USWAG Ilonggo Party-list Rep. Jojo Ang; Quezon City Rep. Patrick Michael Vargas; AGAP Party-list Rep. Nicanor Briones; San Jose del Monte Bulacan; Rep. Florida Robes, Romblon; Rep. Eleandro Jesus Madrona; dati a congressman Benjamin Agarao Jr.; dati a congressman Florencio Gabriel Noel; Occidental Mindoro Rep. Odie Tarriela; Quezon Rep. Reynante Arrogancia; Quezon City Rep. Marvin Rillo; dati a congressman Teodorico Haresco Jr.; dati a congresswoman Antonieta Eudela; Caloocan Rep. Dean Asistio; ken Quezon City Rep. Marivic Co-Pilar.
Mapukpukaw a nobia, nasarakan iti Pangasinan
Nairaman dagiti opisial ti DPWH ken district engineer a kas maibabaon a mangala kadagiti kickback, agraman ni Regional Director Eduardo Virgilio ti Region 5, Unified Management UPMO Director Ramon Ariola III, Bulacan First District Engineer Henry Alcantara, Undersecretary Robert Bernardo, Metro First Pasig City District Engineer Aristotle Ramos, North Manila District Engineer Manny Bulusan, Bulacan Sub-DEO District Engineer Edgardo Pingol, ken ti Quezon Second DEO District Engineer Michael Rosaria.
Segun kadagiti contractor, adu dagiti opisial ti DPWH a nagkuna a saan a bumaba iti 25 a porsiento ti mapan ken ni Rep. Zaldy Co.
Inlawlawag da Discaya nga awan ti inaramidda a ghost project ket nagtungpalda iti nainget nga specification ti DPWH, ket nagdalan amin a proyektoda iti inspection ken material testing sakbay a mairuar ti bayad. Ngem inadmitirda a gapu kadagiti naksay a "kickback" ket bimmassit met ti maganansiarda, isu a nangawatda iti ad-adu pay a proyekto tapno masukatan dagiti pukawda.
Insapatada a mangted iti testamento kontra iti nasaknap a panagkunniber iti Kamara, DPWH, ken dadduma pay nga ahensia ti gobierno, ket nagdawatda ken ni Senate Blue Ribbon Committee chairman Rodante Marcoleta ken Presidente Marcos iti pannakasalaknibda. (Dhel Nazario/Manila Bulletin//Lito Hilidon/Bannawag)
