Inkari ni House Speaker Martin Romualdez nga agtultuloy ti panangsuportar ti Kamara iti insayangkat ni Presidente Marcos Jr. a zero-balance billing, a rumbeng a maipaulog tapno matungpal ti nasaknap a pannakataripato ti salun-at iti entero a pagilian, kas maitunos iti Republic Act (RA) No. 11223 wenno ti Universal Health Care Act.
Dinakamat ni Romualdez ti report ti Department of Health (DOH) a mapanen a 298,221 a pasiente ti nagnumar, a katukad ti ₱26.4 a bilion a dagup ti amin a babayadan dagiti pasiente a naikkan iti basic accommodation kadagiti ospital ti DOH.
Segun ken ni Romualdez, gapu ta inyunay-unay ni Presidente Marcos daytoy a programa iti State of the Nation Address (SONA) idi Hulio, simmaknap ti coverage ti DOH manipud 22, ket nagbalinen a 80, nga ospital iti entero a pagilian.
Maponponduan daytoy babaen ti Medical Assistance to Indigent and Financially Incapacitated Patients program, Philippine Charity Sweepstakes Office (PCSO), ti Philippine Amusement and Gaming Corporation (PCSO), ken direkta a badiet manipud kadagiti ospital ti DOH, malaksid pay kadagiti benepisio nga ipaay ti Philippine Health Insurance Corporation (PhilHealth).
Kaso nga impeachment kontra ken ni Marcos, winaswas ti Kamara
Para iti 2026, ₱260.2 a bilion ti kidkiddawen ti DOH a pondoda tapno mapapardas ti pannakaipatungpal ti universal health care, agraman ti agtultuloy a pannakaisaknap ti zero-balance billing kadagiti nasurok a 80 nga ospital ti DOH. (Ellson Quismorio/Manila Bulletin//Lito Hilidon/Bannawag)
