Intantan ti Pre-Trial Chamber I (PTC I) ti International Criminal Court (ICC) ti confirmation of charges hearing ni dati a presidente Rodrigo Duterte a dati a naikeddeng inton Septiembre 23 agingga 26.
Daytoy ti inwaragawag ti lima a panid a dokumento idi Septiembre 8 a pinirmaan da Presiding Judge Iulia Antoanella Motoc, ken da Judges Reine Adélaïde Sophie Alapini-Gansou, ken María del Socorro Flores Liera.
Sinupiat ni Flores Liera ti botos ti mayoria.
Dinakamatda ti impila ti defense team ni Duterte idi Agosto 18 a nagkiddaw iti indefinite suspension ti confirmation of charges gapu iti "not fit to stand trial" a kasasaad ni Duterte, isu nga inkeddeng ti mayoria ti PTC I a bakante ti petsa a Septiembre 23 ken maitantan ti confirmation of charges agingga a mapakaammuan dagiti partido, kas maitunos iti Rule 121(7) ti Rome Statute.
Pagalagadan iti MAIFIP mainaig iti pannakaiparit ti guarantee letter, iruar ti DOH inton Pebrero
Nupay saan nga imbaga ti PTC I no kasano kabayag ti pannakaitantan ti confirmation of charges hearing, mangiruardanto iti baro nga schedule agraman dagiti petsa ti confirmation of charges hearing.
Impasigurado ti PTC I a ti nakedngan a pannakaitantan ket agpaay laeng iti panawen a kasapulan tapno maikeddeng no kabaelan ni Duterte ti sumurot ken makipaset iti pre-trial proceeding, a napateg a paset iti pangeddengda no agtuloy iti trial ti kaso ni Duterte a crimes against humanity. (Raymund Antonio/Manila Bulletin//Lito Hilidon/Bannawag)
